Ministru Ensino Superiór, Siénsia no Kultura (MESSK), Longuinhos dos Santos. Imajen Tatoli/Francisco Sony

DILI, 26 agostu 2021 (TATOLI) – Ministériu Ensinu Superiór, Siénsia no Kultura (MESSK) fó tempu ba Instituisaun Ensinu Superiór públiku no privadu sira atu to’o outubru 2021 tenke finaliza ona pagamentu injesaun propinas ba estudante sira.

Notísia Relevante : MESSK monitoriza orsamentu izensaun propinas no pulsa internet

Ministru Ensinu Superiór Siénsia no Kultura, Longuinhos dos Santos, hateten pagamentu injesaun propinas semester dahuluk ba IESPP-sira to’o de’it loron 90 tenke finaliza ona. Atu nune’e, bele iha tan biban loron 15 ba IESPP-sira hodi aprezenta relatóriu ba Governu.

“Universidade sira daudaun ne’e halo hela pagamentu ba estudante sira. Pagamentu ne’e ita fó to’o loron 90 atu IESPP sira bele finalize sira-nia prosesu pagamentu. Depois sei iha tan loron 15 ba sira atu aprezenta relatóriu ba governu. Ne’ebé to’o 30 outubru, tinan ne’e, MESSK tenke simu ona relatóriu finál hosi kada IESPP,” Ministru Longuinhos dos Santos hato’o asuntu ne’e bá jornalista sira iha Palásiu Governu, foin lalais ne’e.

Tuir Longuinhos katak prosesu pagamentu injesaun propinas faze dahuluk tenke finaliza tiha iha fulan outubro maka ministériu bele haree fali prosesu pagamentu bá segundu semestrál nian. Ida-ne’e mós depende ba desizaun Governu nian atu kontinua suspende atividade letiva ba IESPP-sira.

UNPAZ iha obrigasaun devolve osan restu

Relasiona ho pagamentu propinas ba kada estudante iha IESPP ho totál $150, maibé realidade iha instituisaun ensinu superiór hanesan UNPAZ sira-nia propinas boot liu maka $140, Ministru Longuinhos dos Santos, afirma osan restu ne’ebé iha ba UNPAZ tenke devolve fali bá kofre Estadu, tanba osan ne’e povu nian.

Enkuantu Magnífiku Reitór Universidade da Paz (UNPAZ) Adolmando Amaral realsa katak dadus konfirmadu UNPAZ nian totál estudante  9.176 mak iha direitu ba pagamentu injesaun propinas. Dadus konfirmadu totál 80% hetan ona pagamentu. Relatóriu pagamentu 50% haruka ona ba ministériu, falta tan relatóriu 30% maka sei iha faze elaborasaun hela.
“Agora daudaun ita nia estudante 7,000 hosi 9.176  maka hetan ona pagamentu metade hosi 28% estudante seidauk hetan pagamentu tanba sei iha hela Munisípiu. Ita seidauk hetan konfirmasaun ne’ebé to’o fulan outubru remata mak estudante sira la halo konfirmasaun, universidade sei devolve filafali osan sira ne’e bá Ministériu,” nia hateten.

Jornalista : Tomé Amado

Editór        : Francisco Simões                                                                      

HAKEREK NO HATÁN

Please enter your comment!
Please enter your name here