Ministru Turizmu Komérsiu no Indústria, José Lucas do Carmo da Silva, no Reprezentante UNDP, Lazima Onta Bhatta, asina nota entendimentu, iha edifísiu MTKI, Bebora, kinta (26/08). Imajen TATOLI/Francisco Sony

DILI, 26 agostu 2021 (TATOLI)–Ministériu Turizmu, Komérsiu no Indústria (MTKI) asina nota entendimentu ho parseiru internasionál, World Food Programme (WFP) no United Nations Development Programme (UNDP), atu fó asisténsia téknika ba programa Loja do Povo, diversifkasaun ai-han no negósiu inovativu.

Ministru Turízmu Komérsiu no Indústria, José Lucas do Carmo da Silva. Imajen TATOLI/Francisco Sony

“Ita asina nota entendimentu ho UNDP atu fó apoiu asisténsia téknika no envolve prosesu selesaun ba implementasaun negósiu inovativu no mós nota entendimentu ho WFP atu fó mós asiténsia teknika hodi dezeña konseitu implementasaun Loja do Povo no fortifika ai-han ba nutrisaun iha Timor-Leste,” Ministru Turizmu, Komérsiu no Indústria, José Lucas do Carmo da Silva, informa, hafoin asina nota, iha edifísiu MTKI, Bebora, kinta ne’e.

VIII Governu konstitusionál hakarak re-dezeña programa Loja do Povo hodi valoriza produtu agríkola ne’ebé prodús hosi povu agrikultór sira.

Enkuantu, implementasaun programa negósiu inovativu atu loke oportunidade ba juventude kreativu no grupu ekonómiku sira iha setór agrikultura, peska, pekuária no inovasaun iha  teknolojia.

“Ita sei loke ba públiku, liuliu atu benefisiáriu hatama proposta atu benefisia ba programa negósiu inovativu no sai  jerente ba Loja do Povo,” Governante akresenta.

Ministru Turizmu Komérsiu no Indústria, José Lucas do Carmo da Silva, asina nota entendimentu ho Reprezentante WFP, Dageng Liu, iha edifísiu MTKI, Bebora, kinta (26/08). Imajen TATOLI/Francisco Sony

Governu liuhosi MTKI husu asisténsia téknika ba kapasitasaun juventude kreativu no grupu ekonómiku sira atubele partisipa másimu no sai benefisiáriu ba programa hirak ne’e.

Iha tinan ne’e, programa pilotu hirak ne’e hahú implementa ona ho orsamentu $142.000, fahe ba implementasaun Loja do Povo hamutuk $100.000 no negósiu inovativu $42.000.

“Ita orsamenta iha tinan ne’e no ita sei kontinua orsamenta iha tinan oin atu benefisia grupu kreativu juventude sira hodi bele dezenvolve setór potesialidade sira hodi kontribui ba prosesu dezenvolvimnetu nasionál liuhosi diversifikasaun ekonómiku,” Ministru subliña.

Orsamentu ba Loja do Povo $100.000 prevee ona iha tinan ne’e, maibé tinan oin sei iha kontinuasaun inklui negósiu inovativu.

Reprezentante WFP iha Timor-Leste, Dageng Liu. Imajen TATOLI/Francisco Sony

Iha biban hanesan, Reprezentante WFP iha Timor-Leste, Dageng Liu, hateten, programa Loja do Povo no diversifikasaun ai-han hodi hasa’e nutrisaun iha Timor-Leste.

“Ami agradese ba programa foun Governu ne’ebé ho orsamentu $100.000, atubele suporta implementa programa Loja do Povo no hola vitamina hodi kahur ho fo’os lokál iha Timor-Leste hodi responde ba programa má-nutrisaun iha Timor-Leste,” nia dehan.

Tuir nia, programa hirak ne’e importante tebes tanba ai-han iha Timor-Leste, maioria konsumu atu sente kabun bosu no iha enerjia de’it, maibé menus vitamina no proteina mais razoável no sufisiente ba isin.

Reprezentante UNDP iha Timor-Leste, Lazima Onta Bhatta. Imajen TATOLI/Francisco Sony

Nune’e mós, Reprezentante UNDP iha Timor-Leste, Lazima Onta Bhatta, hateten, UNDP halo parseiru ho Governu atu  implementa programa negósiu inovativu no apoiu kapasitasaun no selesaun ba proposta ho alvu  ba juventude kreativu sira.

“Ita hakarak fó asisténsia téknika atu organiza no kapasita ita-nia joven sira atubele envolve ba programa ne’e no sai hanesan autór ba dezevolvimentu Timor-Leste,” nia tenik.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here