Pesoál saúde-sira hala’o teste swab ba komunidade iha SIJK, kuarta, (25/08/21). Imajen Tatoli/António Gonçalves.

DILI, 26 agostu 2021 (TATOLI)—Komisaun interministeriál ba implementasaun vasina kontra COVID-19, adia kampaña vasinasaun iha munsípiu Dili, relasiona ho konfinamentu domisiliáriu jerál ba populasaun iha Dili, liuhosi projetu rezolusaun Governu iha kuarta 25 agostu, ne’ebé deside aplika hikas konfinamentu domisiliáriu jerál ba populasaun iha Dili, entre tuku 00:00 loron 27 agostu to’o tuku 23:59 loron 02 setembru 2021.

“Bainhira númeru kazu COVID-19 iha Dili ne’e menus mak ita kontinua hikas kampaña vasinasaun, tanba ita mós iha hela konfinamentu domisiliáriu jerál,” Reprezentante Komisaun Interministeriál ba implementasaun vasina kontra COVID-19, Maria Santina de Jesus Gomes, informa liuhosi konferénsia imprensa, iha salaun MSSI, Caicoli, kinta ne’e.

Notísia relevante:COVID-19: óbitu haat, pozitivu 307 no ativu 4.203

Kona-bá munisípiu sira seluk ne’ebé la aplika konfinamentu obrigatóriu jerál, Komisaun interministeriál kontinua nafatin hala’o kampaña vasina kontra COVID-19.

Hosi projetu rezolusaun ne’e mós sita katak, iha área hotu-hotu munisípiu Dili-nian bandu transporte públiku, liuliu táxi, mikrolete no anguna atu halo sirkulasaun.

Alende ne’e, suspende selebrasaun relijioza koletiva no bandu mós atu halo serimónia fúnebre, ne’ebé envolve partisipasaun ema na’in-sanulu liu no sira ne’ebé partisipa serimónia ne’e rasik tenke uza máskara oin, hodi taka inus no ibun inklui mantein distánsia pelumenus metru ida ho ema seluk ne’ebé prezente iha seremónia ne’e.

Estabelesimentu komersiál, industriál, artezanál ka prestasaun servisu taka ba públiku, ho exesaun ba estabelesimentu-sira ne’ebé autoriza iha Rezolusaun Governu, liuliu estabelesimentu ne’ebé fa’an ai-han no sasán nesesidade bázika, eletrisidade, telekomunikasaun, prestasaun kuidadu médiku, farmásia, postu kombustível-nian, no instituisaun finanseira-sira.

Restaurante-sira bele fornese hahán, aplika rejime take away ka entrega iha uma de’it no estabelesimentu seluk  taka ba públiku bele dezenvolve ninia atividade liuhosi serbisu entrega ba uma de’it.

Vendedór ambulante ba sasán alimentár no sasán ba nesesidade bázika bele mantein sira-nia atividade, no merkadu Manleuana ho Taibessi bele mantein funsionamentu, hahú hosi tuku 06:00 to’o tuku 18:00 otl.

Tuir dadus hosi Sala Situasaun, Sentru Integradu Jestaun Krize (SIJK), ohin rejista kazu óbitu haat, pozitivu 307, rekoperadu 152 no kazu ativu 4.203.

Hosi kazu foun ohin 307, munisípiu Dili rejistadu aas liu hamutuk 243, Baucau 30 no munisípiu seluk hamutuk 34 ne’ebé kompostu hosi mane 154  no feto 153.

Dadus ne’e mós hatudu insidénsia COVID-19 iha Timor-Leste, durante loron hitu ikus maka 23,5/100 mil abitante, enkuantu ba de’it munisípiu Dili,58,1/100 mil abitante.

Insidénsia Covalima ho insidénsia 29,7/100 mil abitante, tuir kedan ho munisípiu Baucau ho insidénsia 23,2/100 mil abitante, munisípiu Manufahi 15,3/100 mil abitante, munisípiu Ainaro ho insidénsia 11,8/100 mil abitante, munisípiu Manatuto ho insidénsia 9,5/100 mil abitante, hafoin munisípiu Viqueque ho insidénsia 6,7/100 mil abitante.

Dadus iha leten hatudu katak, insidénsia munisípiu Dili, munisípiu Covalima no Baucau tutuir malu a’as-liu iha Timor-Leste laran tomak, munisípiu haat seluk – Manufahi, Ainaro Manatuto, Viqueque – mós hatudu risku a’as, atu populasaun hetan da’et, no hada’et tutan virus SARS-CoV-2, iha komunidade nia le’et.

To’o ohin, ema ne’ebé simu ona vasina doze dahuluk iha Timor-Leste hamutuk 380.300 no ema ne’ebé simu ona doze daruak hamutuk 187.600.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here