Ilustrasaun kona-ba Infesaun vias respiratória ho pneumonia

DILI, 26 agostu 2021 (TATOLI)-Ofisiál Saúde Públika Kontrolu Doensa Kontajioza Munisípiu Manatuto, João Pereira da Silva, informa moras ne’ebé daudaun rejistu aas iha Sentru Saúde Munisípiu Manatuto maka Infesaun Vias Respiratória Aguda (IRA).

“Moras ne’ebé komún liu, ami rejista no relata kada fulan mak IRA. Hosi janeiru to’o jullu 2021, hamutuk kazu 1.4045. tuir fali moras sira seluk hanesan dengue iha kazu 56, no seluk tan númeru ki’ik,” João Pereira da Silva ba Agência Tatoli liuhosi telefónika, kinta ne’e.

Nia hatutan, ema ne’ebé afeta ba moras IRA ne’e hahú hosi labarik  to’o idózus, tanba klima agora fulan agostu tempu bailoron, anin, rai-rahun, no komunidade balu te’in sei uza ai-sunu. Seluk fali maka ijiene pesoál, nu’udar kauza moras IRA nia númeru sa’e.

Atu prevene no minimiza moras hirak ne’e mak, saúde Munisípiu Manatuto hala’o programa ida ho naran vizita família, oinsá pesoál saúde hakbesik-aan ba komunidade atu fahe informasaun saúde nian ba komunidade hodi moris ijiene.

Munisípiu Manatuto iha Sentru Saúde neen (6), hanesan Barique, Laclo, Laclubar, Laleia, Manatuto no Soibada ho totál populasaun 49.417.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here