Adjuntu Sekretáriu Jerál Federasaun Futeból Timor Leste (FFTL) Frederico Martins, halo konferénsia imprensa iha FFTL, kinta (26/08). Imajen/FFTL

DILI, 26 agostu 2021 (TATOLI) – Jogu segunda jornada Liga Feto Timor (LFT) tenke adia ba fulan seluk hodi kumpre ba desizaun Governu ne’ebé impoin konfinamentu obrigatóriu (KO) jerál iha sidade Dili, hosi loron 27 agostu to’o 02 setembru 2021.

Notísia Relevante : Abertura LFT, VDL manan Maudoko 2-0

“Governu hasai ona konfinamentu obrigatóriu (KO) to’o loron 2 setembru, maka jogu Liga Feto, ami adia, maibé ohin ami hakat ba Ministériu Saúde tenta husu sira nia autorizasaun bele hala’o jogu ka lae, maibé se autoriza ita mak sei hala’o jogu tuir nafatin protokolu saúde nian no ami mós iha regulamentu ba prevensaun COVID-19,”  Adjuntu Sekretáriu Jerál Federasaun Futeból Timor Leste (FFTL) Frederico Martins, hateten liu hosi konferénsia imprensa ne’ebé hala’o iha edifísiu FFTL Dili, kinta ne’e.

Karta ne’ebé FFTL submete ba Ministériu Saúde ho rekizitu ne’ebé mak rigor hanesan hala’o jogu sei laiha adeptu sira no FFTL rasik prepara material prevensaun sira ba jogadór.

“Karta ami haruka ona ba Ministra Saúde hein loron ida ka rua tan sira fó resposta mai ami,” nia hateten.

Husu autoriza selesaun nasionál hala’o treinamentu

Iha  biban ne’e FFTL husu ba Ministériu Saúde atu fó fleksibilidade ba ekipa selesaun nasionál U-23 no seniór atu hala’o nafatin treinamentu tanba jogu kualifikasaun AFC Cup sei hala’o 27 outubru mai ne’e iha Singapura.

“Ita nia intensidade treinamentu ba selesaun nasionál nian ne’e kontrata ona treinadór ba fíziku nian no komesa halo ona programasaun ba fíziku nian, se programasaun ne’e mak ita hapara agora mak impaktu boot ba kondisaun jogadór sira nian, entaun ami hato’o ona pedidu ba Ministériu Saúde para bele autoriza atividade treinu lao nafatin ho kumpre ba rekizitu sira protokolu saúde nian,” Adjuntu Sekretáriu Jerál FFTL informa.

Nia dehan, bainhira Ministériu Saúde autoriza mak FFTL sei implementa regulamentu sira ne’e hotu.

Jogadór iha selesaun nasionál U-23 no seniór hamutuk na’in-30 no ofisial na’in-hitu (7).

Kona-ba jogu kualifikasaun AFC Cup sei la adia tanba kalendáriu fiksu ona no Timor-Leste iha obrigasaun boot atu ba partisipa.

“Se kuandu la partisipa mak sei hetan sansaun hosi FIFA no AFC rasik,”  Frederico Martins afirma.

Jornalista  : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here