Formandu sira iha Sentru Dezenvolvimentu Komunitáriu (CDC, sigla portugés) Baucau simu graduasaun iha tinan kotuk. Imajen/Espesiál.

DILI26 agostu 2021 (TATOLI)—Diretór Sentru Dezenvolvimentu Komunitáriu (CDC, sigla portugés) Baucau, Vicente Matos Belo informa, sesta (27/08) ne’e CDC sei adia serimónia graduasaun ba formandu nain-30 tanba Governu implementa konfinamentu obrigatóriu iha Dili no serka sanitária iha Baucau.

Notísia Relevante: CDC Baucau hahú reativa hikas atividade formasaun

“Ami aban atu halo graduasaun ba formandu 30, maibé ohin ami hetan konfirmasaun hosi SEFOPE, sira husu ami tenke muda fali tanbá agora iha Díli konfinamentu obrigatóriu no iha Baucau Serka Sanitária. Ne’ebé, ami tenke halo tuir buat ne’ebé hosi SEFOPE haruka mai ami,” Vicente Matos Belo, hateten ba Agência Tatoli, liuhosi telefónika, kinta ne’e.

Kona-ba graduasaun ne’e, sentru ne’e depende ba desizaun hosi Konsellu Ministru (KM) no tenke la’o tuir desizaun hosi Governu tanbá sentru ne’e akreditadu hosi INDMO.

Maske, CDC labele realiza graduasaun maibé sentru ne’e nafatin hala’o atividade formasaun ba formandu sira, liuhosi kumpre regra prevensaun hosi Ministériu Saúde (MS) no Organizasaun Saúde Mundiál (OMS).

“Formasaun daudaun ne’e la’o hela no agora sentru ne’e hein de’it karta hosi SEFOPE liu-liu hosi Dirasaun Formasaun Profisionál hatun despaixu katak formasaun ne’e para, entaun ami tenke para. Maibé, daudaun ne’e formasaun la’o hela,” nia informa.

Sentru ne’e estabelese iha tinan 2015 no iha tinan 2015 to’o 2021 ne’e, formandu ne’ebé tuir formasaun iha sentru ne’e hamutuk 230.

Hosi númeru ne’e na’in29 mak hetan ona servisu iha Instituisaun Governu, balun ba servisu iha Australia, no balun kontinua estudu iha universidade sira iha Dili.

Sentru ne’e foku liua ba área formasaun agrikultura nian ne’ebé sei haree kona-bá pekuaria, planta industria, área hortikultura nian, no formadór iha sentru ne’e hamutuk na’in13.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here