Atendimentu kliente iha sukursál BNCTL. Imajen/BNCTL

DILI, 26 agostu 2021 (TATOLI)Banku Nasionál Komérsiu Timor-Leste (BNCTL, sigla portugés) komprometidu kontinua mellora atendimentu ba kliente iha ne’ebé hela uha rai-laran no rai-li’ur.

“BNCTL halo ezersísiu internál no halo konsultasaun oioin, konklui atu dezenvolve polítika no prosedimentu ne’ebé permite loke konta ho métodu indiretamente. Mekanizmu ne’e la nesesita prezensa fizikamente hosi aplikante atu loke konta bankária iha banku, maibé ho alternativa bele manda dokumentu no rekezitu ho eletronikamente liuhosi email ka meiu seluk hanesan WhatsApp ba enderesu ne’ebé banku sei indika,” refere nota ne’ebé Agência TATOLI asesu, kinta ne’e.

Inisiativa ne’e mosu tanba membru sosiedade hato’o preokupasaun ba BNCTL, katak sira iha interese loke konta bankária, maibé tanba okupadu ho atividade diária, hela iha área ne’ebé laiha prezensa banku no iha estranjeiru ka nasaun seluk, mak la konsege marka prezensa iha banku.

Nune’e, prosedimentu atu loke konta indireta ka non face-to-face account opening, maka kliente presiza marka prezensa iha banku BNCTL atu loke konta, aplikante bele asesu formuláriu ba abertura konta liuhosi foti iha banku nia edifísiu sira.

Enkuantu, seluk maka bele asessu hosi BNCTL nia website www.bnctl.tl, dokumentu indikadu hanesan rekezitu atu loke konta bankária ne’ebé sei submete liuhosi email, WhatsApp ka meiu seluk ne’ebé seguru liu banku sei informa aplikante.

Dokumentu sira ne’ebé prienxe kompletu no asinadu ona tenke haruka via email ba parte banku ho formatu pdf ka hasai foto ho moos no manda via WhatsApp.

Parte banku bele rejeita atu prosesa loke konta bankáriu bainhira dokumentu submetidu ladun di’ak no difikulta banku atu identifika aplikante, nune’e atu prosesa aplikante tenki hasai foto close up ka besik, la uza oklu no máskara no kaer ho identidade ne’ebé submete hanesan kartaun Eleitorál, Billete Identidade ka Pasaporte ne’ebé válidu ne’ebé emite husi entidade kompetente no seidauk expira no fotografia sira bele manda hosi email ka WhatsApp.

Bainhira banku satisfaz no aseita ho dokumentu aplikante, funsionáriu banku sei halo verifikasaun no verifika autentisidade dokumentu no aplikante hodi halo entrevista badak ho aplikante kliente liuhosi video call liuhosi WhatsApp, Zoom ka meiu komunikasaun ho kliente iha loron no oras ne’ebé kliente no pesoál banku konkorda hamutuk.

“Dezisaun ba banku atu fasilita abertura konta sei depende ba rezultadu video conference ho aplikante atu prienxe rekezitu ne’ebé hatene liu kliente,” esplika nota hosi banku.

Banku sei prosesa abertura konta no informa ba kliente númeru konta no númeru IBAN liuhosi email ka WhatsApp, ba própriu na’in ba konta no kliente bele vizita banku hafoin hetan ona konfirmasaun konta bankária atu halo depózitu inisiál ka bele halo transferénsia lokál no internasionál ba konta bankária.

“Kliente bele fó prokurasaun ba ema ne’ebé nia iha konfiansa atu halo depózitu inisiál, inklui lori dokumentu orijinál ne’ebé nia prienxe no asina, hafoin foti kartaun débitu ka kartaun seluk banku ne’ebé disponibiliza karik kliente aplika,” nota BNCTL haktuir.

Aleinde ne’e, kliente bele hato’o pedidu atu hetan estratu bankária iha kualker tempu bainhira presiza no bele aplika servisu internet banking atu fasilita tranzasaun bankária balun, konsulta balansu no seluk tan.

Enkuantu, servisu internet banking sei lansa ba kliente banku hothotu iha fulan agostu ka setembru 2021.

Aplikante tenki konsiente no responsabliza ba abertura konta ho métodu ne’e no sei halo esforsu sira ne’ebé nesesáriu atu kumpre rekezitu banku, estritamente no sei observa prinsípiu prudente iha prosesu hotu ba métodu abertura konta ne’e.

Loke konta bankária ba kliente ema singulár sira ne’ebé hela iha rai-li’ur, dokumentu ne’ebé submete mai BNCTL loke konta nian tenki legaliza hosi Embaixada ka Konsuladu.

Bainhira kliente labele asesu ba Embaixada ka Konsuladu hodi hetan rekoñesimentu ho razaun ne ebé adekuadu Banku sei konsidera kazu pur kazu.

Konta bankária ne’ebé bele loke ho métodu ida ne’e maka depózitu jiro kompañia, depózitu poupansa ka Saving Account, depózitu ‘Hau Nia Futuru’, depózitu Matenek (Estudante), depózitu ho prazu ka Time Deposit, depozitu Emigrante, no depozitu Pensionista.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here