Xefe Bankada UDT, Francisco David Xavier Carlos. Imajen Tatoli/Egas Cristovão.

DILI, 25 agostu (TATOLI)—Bankada União Democrática Timorense (UDT) enkoraja deputadu sira atu aproveita kontaktu eleitorál halo mós kampaña kona-ba importánsia hosi vasinasaun ba komunidade iha baze, nune’e komunidade bele simu vasina.

UDT la hatudu liman ba VIII Governu ho situasaun ne’ebé povu Timor laran tomak hasoru, maibé UDT hakarak kontribui atubele buka-dalan ba solusaun atu nune’e bele fó esperansa ba povu nia moris.

“Bankada UDTL informa ba Governu katak bainhira halo kontaktu eleitorál iha baze, deputadu sira tenke enkoraja komunidade simu vasina tanba komunidade barak seidauk hatene loloos funsaun hosi vasina ne’e. Ita tenta nafatin ho neineik maibé beibeik atu nune’e povu bele sente katak vasina ne’e ninia efeitu haforsa imunidade,” Xefe Bankada UDT, Deputadu Francisco David Xavier Carlos, ko’alia iha uma fukun iha estensaun estadu emerjénsia ba dala-XVII.

Dalaruma ema hanoin katak COVID-19 nu’udar polítika ida hosi parte Governu no ema-ne’ebé de’it, hanoin ida-ne’e labele akontese beibeik tanba pandemia COVID-19 ne’e afeta iha mundu tomak.

Tanba ne’e, nu’udar reprezentante povu iha uma fukun ida-ne’e, iha devér no morál hatutan ba povu atu moras ne’e labele hada’et ba sira, la’ós Ministériu Saúde mak halo ida-ne’e maibé deputadu sira ba iha baze hodi hakbesik an ba povu hodi lori komunidade hakbesik ba postu saúde sira hodi simu vasina.

Dalaruma, nia dehan, timor-oan fó sala ba malu katak iha fronteira la fó seguransa ho másimu, hodi hanoin katak buat hotu fásil maibé kuandu tama iha sistema nia laran komplikadu, tanba ho inimigu invizivel ida-ne’e.

Xefe Bankada FRETILIN, Deputadu Francisco Miranda Branco, hateten reprezentante povu sira tenke enkoraja povu simu vasina tanba vasina nu’udar dalan ida hodi hasa’e ema nia imunidade hasoru COVID-19.

“Deputadu sira hosi Bankada FRETILIN durante ne’e jala’o enkontru eleitorál, sempre defende no ajuda sosializa ba ita-nia populasaun kona-ba nesesidade atu simu vasina, tanba vasina nu’udar dalan ne’ebé nasaun sira iha mundu tomak foti hodi hasa’e ita-nia imunidade hasoru virus ida-ne’e,” nia dehan.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here