Sekretáriu Estadu Kooperativa, Elizário Ferreira, konvoka enkontru ho dirijente no membru kooperativa kréditu uniaun Afihini, iha sede suku Soro, kuarta (25/08). Imajen/SEKoop

LAUTÉM, 25 agostu 2021 (TATOLI)–Sekretáriu Estadu Kooperativa (SEKoop), Elizário Ferreira, halo enkontru ho dirijente no membru kooperativa kréditu uniaun Afihini iha suku Soro, postu administrativu Lospalos Villa, munisípiu Lautém, ne’ebé iha biban ne’e enkoraja atu dezenvolve kooperativa.

“Ha’u apresia ita-bo’ot sira, tanba maski feto de’it maibé brani harii kooperativa kráditu uniaun ida iha suku, ha’u enkoraja ita-bo’ot sira hamutuk dezenvolve kooperativa, tanba buat ne’ebé ita harii ohin, aban monu ne’e la’ós kooperativa,” Sekretáriu Estadu hateten durante intervensaun iha enkontru ho kooperativa, iha suku Soro, kuarta ne’e.

Tuir governante ne’e, kooperativa barak mate tanba ema ladún iha kompromisu no la fiar malu to’o monu le’et.

“Iha Timór, kooperativa ne’ebé susesu, dirijente feto no iha sede luxu maka kooperativa LANAMONA no kooperativa Hikmor iha Aileu, ne’ebé sira-nia kooperativa dezenvolve di’ak liu do que ami mane sira ne’ebé lidera kooperativa, ha’u hakarak imi mós sai hanesan ne’e hodi bele fó sustentabilidade ekonomia ba komunidade iha suku ne’e,” Sekretáriu Estadu enkoraja.

Ba kestaun ne’e, SEKoop kompremetidu kontinua fó formasaun ba kooperativa Afihini.

“Ami sei kontinua fó formasaun no kapasitasaun ba imi hodi haruka ekipa SEKoop halo akompañamentu ba imi, ha’u husu ba Xefe suku sira, se bele husik fatin balun iha sede suku nune’e oferese ba kooperativa halo serbisu to’o sira hetan fatin própriu ne’ebé SEKoop rasik sei apoiu,” nia akresenta.

Biban ne’e, Sekretáriu Estadu husu ba estrutura kooperativa atu esforsu buka envolve komunidade iha suku Soru iha kooperativa Afihini, nune’e sira bele sente benefísiu ekonómiku no dezenvolve ekonomia família.

Nune’e, Sekretáriu Estadu husu dirijente no membru kooperativa, hodi kada ema dada ema ida no bainhira hetan ona ema 250 envolve iha kooperativa, maka parte Governu liuhosi SEKoop bele fasilita osan $7.500 hodi harii sede kooperativa, enkuantu kona-ba ekipamentu ba kooperativa, tempu badak ekipa sei fasilita.

Iha fatin hanesan, Dirijente Kooperativa kréditu uniaun Afihini, Euzénia dos Santos, hateten,  krisaun kooperativa kréditu uniaun maihosi inisiativa rasik.

“Ami harii kooperativa ne’e tanba hakarak duni atu envolve-an iha vida kooperativa, hafoin ekipa SEKoop mai fó formasaun hodi fahe esperiénsia kona-ba vantajen kooperativa, tanba ne’e ami ho maioria feto deside tama kooperativa,” nia hatutan.

Kooperativa kréditu uniaun ne’e rejista ema 75, maibé na’in-36 maka sai ona membru definitiva ba grupu kooperativa.

“Ami agora iha kapitál $1.000 resin, maibé ami sei buka membru barak liután, tanba ne’e ami husu ba SEKoop hodi apoiu eskritóriu ba ami hodi halo serbisu,” nia tenik.

Nune’e mós, Xefe suku Soro, Adriano da Silva, husu ba SEKoop atu kontinua fó formasaun no kapasitasaun ba estrutura no membru kooperativa, nune’e kooperativa kréditu uniaun Afihini bele eziste nafatin.

Iha sorin seluk, líder komunitáriu ne’e apresia ho prezensa Sekretáriu Estadu Elizário no komitiva tanba bele partilla esperiénsia no koñesimentu kona-ba kooperativa, nune’e bele motiva ema envolve-an iha atividade kooperativa.

“Ha’u espera ba oin kontinua apoia nafatin sira hodi bele evolve ema barak, nune’e iha suku Soru komunidade sira bele sente vantajen hosi kooperativa rasik,” nia hameno.

Kooperativa krédiu uniaun Afihini hanesan kooperativa foun, ne’ebé hasoru difikuldade hanesan laiha sede no ekipamentu hanesan komputadór, printer, surat tahan, no seluk tan atu suporta serbisu kooperativa.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here