Logo Sekretaria Estadu Juventude no Desportu (SEJD)

DILI, 25 agostu 2021 (TATOLI) – Diretora Nasional Alta Kompetisaun Sekretáriu Estadu Juventude no Desportu (SEJD), Maria Luiza Monteiro, hasoru malu ona ho ekipa Federasaun Boxe Amadora Timor- Leste (FBATL) hodi husu adia atividade ezibisaun selebra loron internasionál Boxe ne’ebé sei hala’o iha 26-27 agostu ne’e.

Rekomendasaun SEJD nian ne’e haree ba númeru pandemia COVID-19 ne’ebé kada loron aumenta ba 500-resin.

“Kona-ba ezibisaun Boxe nian ne’ebé  atu hala’o iha 26-27 agora hodi komemora loron internasionál AIBA nian, maibé ita haree ba kondisaun agora liu-liu variante delta komesa afeta ba ema barak hanesan horiseik de’it sa’e ba 500 resin, entaun Sekretáriu Estadu rasik mak husu atu adia de’it ba fulan sira tuir mai karik númeru kazu COVID-19 menus ona, bele hala’o atividade ne’e,” diretora Maria Luiza Monteiro ba Agência Tatoli iha edifísiu SEJD Dili, kuarta ne’e.

Nia dehan, rekomendasaun Governu nian tenke adia maibé fila fali ba FBATL hodi deside karik iha alternativu seluk atividade bele avansa.

“Iha sira nia atividade ne’e, SEJD apoiu finanseiru ho total 7.000-resin. Osan ne’e ba sira nia prémiu no atividade hotu,” nia dehan.

Parte FBATL aseita ho desizaun SEJD nian hodi adia atividade ne’e ba tempu seluk bainhira númeru CCOVID-19 menus.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here