Sekretária Estadu Igualdade no Inklusaun, Maria Jose da Fonseca Monteiro de Jesus. Imajen TATOLI/ Egas Cristovão.

DILI, 25 agostu 2021 (TATOLI)—Sekretária Estadu ba Igualdade no Inkluzaun (SEII), Maria José da Fonseca Monteiro de Jesus, hateten liuhosi rede referál nia advokásia, estratéjia no prevensaun mak bele hamenus violénsia iha sosiedade nia leet.

Notísia Relevante: Kombate Violénsia Bazea ba Jéneru presiza involve organizasaun sosiedade sivíl

Governu liuhosi Sekretária Estadu ba Igualdade no Inkluzaun (SEII) kontinua akumula hanoin hotu hosi membru rede referál sira no sei halo advokásia ho parte hotu-hotu.

“Servisu advokásia no estraéjia ita hotu nia knaar atu bele halo servisu ida-ne’e, hodi bele prevene violénsia oioin iha ita-nia rain. Ita mós tenke asegura katak violénsia ne’e la’ós dalan atu rezolve diferensa ka dezentendimentu sira. Nune’e, rede referál nia ezisténsia importante tebes atu asegura komponente vulnerável iha família, ferik-katuas, maluk sira portadora defisiénsia, maluk sira hosi komunidade LGBTQI, liu-liu labarik-feto no mane sira tenke bele moris seguru no livre hosi violénsia oioin iha uma-laran no iha sosiedade,” Maria José da Fonseca Monteiro de Jesus hateten ba Ajénsia TATOLI, iha salaun Maria Goreti, Obrigado Barak, Dili, foin lalais ne’e.

Ho asuntu ne’e, SEII ho Rede Referál sira, tersa (24/08) ne’e halo sorumutu hodi ko’alia kona-ba progresu no dezafiu sira-ne’ebé membru rede referál sira hasoru iha serbisu atendimentu ba vítima no sobrevivente violénsia oioin durante pandemia COVID-19.

Nia hateten, rede referál refere iha rede prinsipál rua mak hanesan rede referál ba estratéjia no advokásia ne’ebé lidera hosi SEII ho ninia knaar mak atu halo diskusaun no oinsá buka solusaun kona-ba preokupasaun hosi rede referál fornesedór servisu nian, hanesan dezenvolve abordajen ne’ebé estratéjiku ba apoiu polítika ne’ebé halo hodi implementa programa sira kombate Violénsia Bazeia ba Jéneru (VBJ) no halo advokásia ba mudansa ba polítika.

Diretora Diresaun Nasionál Abordajen Integradu Jéneru Kapasitasaun Mulher (DNAIGCM- sigla portugés), Maria Filomena Babo Martins, atualiza informasaun hosi parseiru sira no aprezenta Termu Referénsia (ToR) rede referál nian ne’ebé sei sai hanesan matadalan ba membru rede referál sira atu halo servisu di’ak liu tuir ToR ne’ebé iha ona.

“ToR ne’e hetan ona aprovasaun hosi membru rede referál hotu ho kondisaun sei iha adisionál ruma hodi ajusta intervensaun hosi kada instituisaun nian,” nia dehan.

Iha sorumutu ne’e, fó mós oportunidade ba kada membru rede referál sira hodi hato’o sira-nia progresu servisu ne’ebé durante ne’e hala’o ona liu-liu liga ba iha atendimentu ba vítima no sobrevivente violénsia oioin tuir dadus ne’ebé relata hatudu númeru violénsia sira aumenta.

Sorumutu entre SEII ho rede referál ne’e hetan partisipasaun hosi membru rede referál hotu hanesan MSSI, Ministériu Justisa (MJ), Ministériu Saúde (MS), Ministériu Edukasaun Juventude no Despostu (MEJD), PNTL-VPU, FOKUPERS, JSMP, Merry Stopes, Care International, AIFela, BELUN, ACBIT, Rede Feto, MHVF, PRADET, Fundasaun Alola, Ajénsia ONU no ONG nasionál seluk ne’ebé serbisu iha área prevensaun violénsia bazea ba jéneru.

Jornalista : Osória Marques 

Editór       : Cancio Ximenes

HAKEREK NO HATÁN

Please enter your comment!
Please enter your name here