Ministru Ensinu Superiór, Siénsia no Kultura (MESSK), Longuinhos dos Santos. Imajen Tatoli/ Egas Cristóvão

DILI, 25 agostu 2021 (TATOLI) – Haree ba númeru kazu pozitivu COVID-19 ne’ebé sa’e maka’as iha Dili no territóriu Timor-Leste, maka Ministru Ensinu Superiór Siénsia no Kultura (MESSK) Longuinhos dos Santos, sei hasai sirkulár suspensaun atividade letiva ba Instituisaun Ensinu Superiór Públiku no Privadu-sira.

Notísia Relevante : Governu aplika hikas konfinamentu domisilariu iha Dili hahú 27 agostu

Tuir planu MESSK, kinta (26/08), sei fó sai sirkulár suspensaun atividade letiva, inklui suspende atividade graduasaun iha Universidade Nasionál Timor-Lorosa’e (UNTL) ho baze  hosi rekomendasaun Ministra Saúde.

 “Ha’u  foin simu karta rekomendasaun hosi Ministra Saúde husu suspende bá atividade letiva iha IES tantu públiku no privadu tanba Governu implementa ona  medida konfinamentu obrigatóriu,” Ministru Longuinhos dos Santos, informa báa jornalista sira hafoin remata enkontru Konsellu Ministru iha Palásiu Governu, kuarta ne’e.

Hosi sorin seluk, Vise-Reitór UNTL trata asuntu akadémiku no garantia kualidade, Samuel Venâncio de Sousa Freitas, deklara universidade preparadu ona atu realiza graduasaun ba estudante finalista purvolta 349 iha sesta (27/08). Maibé, desizaun Konsellu Ministru nian implementa medida konfinamentu obrigatóriu hahú 27/08 bá oin, universidade labele halo buat ida, signifika graduasaun ba estudante finalista sira sei labele realiza.

Estudante finalista hosi fakuldade neen (6) atu gradua ne’e mak hanesan  Fakuldade Siénsia Sosiais, Fakuldade Ekonomia, Fakuldade Edukasaun Arte Umaniora (FEAH), Fakuldade Enjeñaria, Fakuldade Filozofia ho Fakuldade Agrikultura.

Jornalista : Tomé Amado

Editór        : Francisco Simoés

 

HAKEREK NO HATÁN

Please enter your comment!
Please enter your name here