MAE disemina dekretu lei deskonsentrasaun serbisu munisipál iha Bobonaro, kuarta (25/08/21). Imajen Tatoli/Sérgio da Cruz.

BOBONARO, 25 agostu 2021 (TATOLI)—Ministériu Administrasaun Estatál (MAE), liu hosi Diresaun Unidade Asesoria Tékniku (UAT) no Diresaun Serbisu Nasionál Instalasaun munisipál, disemina dekretu lei númeru 54, segunda alterasaun hosi dekretu lei númeru 3/2016 kona-ba deskonsentrasaun serbisu munisipál, ba Diretor Serbisu munisipál-sira no funsionáriu liña setorál iha munisípiu Bobonaro, kuarta ne’e.

Diretór Nasionál Unidade Asesoria Téknika, Lourenço de Araújo Berdato, hateten atividade ne’e atu fó- hanoin ba funsionáriu hotu-hotu iha Munisípiu Bobonaro, bainhira presta serbisu tuir lei ne’ebé mak Governu sentrál deskonsentra ba autoridade munisipál.

Notísia relevante:SAMES introdús sistema eletrónika ‘Msuplay’ ba pesoál saúde Bobonaro-Liquiça

“Ami mai disemina lei ne’e atu relembra fali nune’e funsionáriu hotu-hotu bele lee fila-fali, bainhira halo kna’ar karik tuir baze legál, liu liu diretór serbisu munisipál-sira,” Diretór ne’e hateten iha intervensaun, iha salaun administrasaun munisipál Bobonaro.

Diretór ne’e esplika, diseminasaun kona-bá lei ne’e, atu eduka diretór no funsionáriu munisipál-sira atu oinsa halo koordenasaun serbisu ho Autoridade munisipál diak liu tan tanba serbisu diresaun munisipál balun tutela ba Prezidente Autoridade.

“Lei ne’e heteten, Prezidente Autoridade munisipal  mak ita bot sira nia superior, la’ós ita bot sira nia ministériu, tanba ne’e tenke koordena ho autoridade munisipál,” nia fó hanoin.

Diresaun Unidade Asesoria Téknika no Servisu Instalasaun munisipál, bainhira konklui diseminasaun lei ne’e iha munisipiu hotu-hotu sei propoin ba Ministru Administrasaun Astatal, atu ba diskute iha Konsellu Ministru, nune’e Ministériu-sira bele intrega podór mai munisipál tanba lei aprova ona.

Nune’e mós Prezidente Autoridade munisipiu Bobonaro, Ernesto de Oliveira Barreto, apresia ho lei ne’e tanba bele submete serbisu diresaun balun iha autoridade munisipiu atu kontrolla.

Husu ba funsionáriu hotu-hotu tenke lee hodi intende didi’ak, nune’e bainhira hala’o funasaun hanesan servidór Estadu  tuir lei.

Diseminasaun ne’e hala’o durante loron rua, hetan partisipasaun másimu hosi Diretór Serbisu Munisipál Bobonaro, funsionáriu-sira.

Atividade ne’e mós hala’o ona iha munisipiu neen hanesan Ermera, Ainaro, Aileu, Manufati, Covalima no Lopalos tuir planu sei kontinua ba munisípiu seluk.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here