Vizita Sekretáriu Estadu Kooperativa, Elizário Ferreira ba fatin Kooperativa Peska O Sol Nacendo Valusere, iha Tutuala. Imajen TATOLI/Natalino Costa

LAUTÉM, 25 agostu 2021 (TATOLI)–Grupu Kooperativa Peska Valusere, iha postu administrativu Tutuala, munisópiu Lautém, husu Sekretaria Estadu Kooperativa (SEKoop) atu fasilita formasaun iha área manutensaun ró.

Prezidente Kooperativa Peska O Sol Nacendo Valusere, Adriano da Costa, hato’o durante akompañ vizita Sektáriu Estadu Kooperativa, Elizário Ferreira, ho komitiva.

Tuir responsável grupu kooperativa ne’e, ró peska rua ne’ebé parte SEKoop entrega ba kooperativa ne’e iha tinan 2019, daudaun ho kondisaun di’ak no membru kooperativa sira uza hodi halo atividade peska.

“Ami kontente tanba Sekretáriu Estadu to’o mai ami-nia fatin no haree kondisaun, maibé ami husu atu fasilita formasaun tékniku oinsá atu halo manutensaun ró, tanba durante ne’e ami uza de’it ró maibé la hatene halo manutensaun,” Prezidente Kooperativa hateten iha Tutuala, kuarta ne’e.

Adriano da Costa haktuir, Grupu Kooperativa ne’e uza ró iha loron sesta, sábadu no domingu hodi halo atividade peska.

“Loron tolu ami hetan rendimentu $500 to’o $600, tanba antes ne’e turizta barak no sira hakarak haree illa Jaco, entaun ami tenke lori bá,” nia akresenta.

Maski nune’e, daudaun rendimentu laiha tanba situasaun pandemia halo atividade paradu.

Hatan ba kestaun ne’e, Sekretáriu Estadu Elizário Ferreira kompromete sei fó apoiu formasaun ba Grupu Kooperativa Peska ne’e.

“Ró rua hanesan aset SEKoop ne’e, ami sei tau-matan, ha’u anota hela hodi buka mekániku ida  ba ró hosi Don Bosco, karik iha bele fó formasaun ba imi,” governante ne’e kompromete.

Nune’e, nia mós husu ba estrutura kooperativa atu kontinua rona malu, nune’e bele lori kooperativa ba dalan di’ak hodi fó benefísiu ekonómia ba membru sira.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here