Komandante Operasaun Nasionál PNTL, Superintendente Xefe Pedro Belo.

DILI, 25 agostu 2021 (TATOLI)—Komandu Jerál, Polísia Nasionál Timor-Leste (PNTL), halo hela  investigasaun ba membru hosi Unidade Patrullamentu Fronteira (UPF), ne’ebé deskonfia fasilita timoroan balun, hakat ilegál hosi fronteira terreste ba Atambua-Indonézia, hodi tuir ezame arte marsiál.

“Atu hetan prova tenke liuhosi prosesu investigasaun kle’an. Tanba ne’e, iha ona prosesu nia laran no rezultadu sai mak bele anunsia,” Komandante Operasaun Nasionál, Superintendente Xefe, Pedro Belo, hateten ba jornalista-sira iha Sentru Formasaun Polísia, Comoro, kuarta ne’e.

Notísia relevante:PNTL detein tan joven na’in-haat hakat ilegál fronteira

Maski la esplika detalla kona-bá membru na’in hira mak Komandu investiga ona, maibé Pedro Belo dehan prosesu la’o duni.

Iha 07 agostu, Unidade Batallaun Orden Públika (BOP), Kompañia Operasaun Espesiál (COE), detein sidadaun na’in 11 iha suku Saburai, postu administrativu Maliana, munisípiu Bobonaro, bainhira tenta atu hakat ilegál hosi territóriu ba Indonézia, tanba deskonfia membru PNTL hosi UPF hamutuk ho sidadaun Indonézia ida koko fasilita hakat ilegál ba Indonézia.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here