Vise-Primeiru Ministru no Ministru Planu no Ordenamentu, José Maria dos Reis. Imajen TATOLI/Francisco Sony

DILI,  25 agostu 2021 (TATOLI)–Vise Primeiru Ministru no Ministru Planu Ordenamentu (MPO) no Prezidente Komisaun Administrasaun Fundu Infraesturutra (KAFI), José Maria dos Reis, hateten, daudaun ne’e parte komisaun hahú diskute ho ministériu relevante sira kona-ba projetu infraestrutura sira atubele orsamenta iha tinan fiskál 2022.

“Ami liuhosi KAFI halo diskusaun no prepara hela inklui aprova planu projetu infraestrutura sira, hafoin sei lori ba Komisaun Revizaun Orsamentu Polítika (KROP) hodi orsamenta ba 2022,” Ministru hateten iha Palásiu Governu, kuarta ne’e.

Notísia relevante: MOP atualiza planifikasaun projetu infraestrutura tinan 2022 ba PM

Iha diskusaun KAFI, atuál Prezidente KAFI ne’e informa katak sei kontinua lori projetu infraestrutura ne’ebé seidauk ezekuta iha tinan ne’e hodi bele implementa iha tinan oin.

Iha tinan 2021, projetu estratéjiku sira hosi liña ministeriu hotu hamutuk 300 resin, kompostu hosi estrada, ponte no infraestutura bázika sira seluk.

“Ha’u hanoin atu projetu sira seidauk implementa no balun sei iha prosesu  mak ita atu lori filafali re-aproria ba tinan 2022 no kontinua rezolve problema infraestrutura lubuk ida ne’ebé mosu iha tinan sanulu ba kotuk,” nia afirma.

Hosi projetu 300 resin ne’e, liña ministériu balun hahú implementa ona projetu balun no balun seidauk implementa tanba presiza tuir prosedimentu aprovizionamentu no legál.

Iha OJE 2021, Governu prevee millaun $339 ba Fundu Infraestrutura no hosi montante orsamentu ne’e, prevee millaun $41,5 ba ekipamentu informátika kabu submarinu.

Fundu Infraestrutura ho montante millaun $339, kompostu hosi $32.000 ba saláriu no vesimentu, millaun $1,040 ba bens  no servisu no millaun $338.533 ba kapitál dezenvolvimentu.

Iha Fundu Infraestrutura prevee $60.000 ba programa boa governasaun no jestaun institusionál, setór agrikultura millaun $3,798, água no saneamentu millaun $3,449, dezenvolvimentu urbanu no rurál millaun $6,190, edifísiu públiku millaun $7,693, edifísiu edukasaun millaun $4,843, enerjia elétrika millaun $18,3, ekipamentu komputadór ka informátika ba kabu sub marinu millaun $41,588, saúde millaun $4,844, seguransa no defeza millaun $13.884.

Nune’e mós, solidaridade sosiál millaun $1, projetu tasi mane millaun $8,5, aeroportu millaun $19,8, preparasaun dezeñu no supervizasaun ba projetu foun millaun $19,8, preparasaun dezeñu  no supervizasaun ba projetu foun millaun $9, estrada millaun $105,2, ponte millaun $4,8, portu millaun $1,8, programa ba setór turizmu $652.000, programa espréstimu millaun $70,7, programa setór finansa millaun $2,9, Sekretáriu Estadu Juventude no Desportu millaun $2, KAFI millaun $1,011, programa manutesaun no reabilitasaun millaun $6,924.

Ezisténsia Fundu Infraestrutura bazeia ba Planu Estratéjiku Dezenvolvimentu Nasionál (PEDN) 2011-2030, ho objetivu prinsipál apoia projetu estratéjiku sira ne’ebé hasa’e kresimentu ekonómiku Timor-Leste.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here