Jogu futeból sub-22 époka 2021, iha estádiu Maliabaka Yamato Maliana, Madiran FC halakon ekipa Maliana United (MU), iha semi finál ho rezultadu 1:0, kuarta (25/08/21). Imajen Tatoli/Sérgio da Cruz.

BOBONARO, 25 agostu 2021 (TATOLI)—Jogu futeból sub-22 époka 2021, iha estádiu Maliabaka Yamato Maliana, Madiran FC halakon ekipa Maliana United (MU), iha meiu finál ho rezultadu 1:0, kuarta ne’e.

Iha jogu primeira parte, ekipa rua iha oportunidade ba  produsaun golu, maibé la konsege tanba ida-idak ho nia tátika no forsa defende ninia área to’o árbritu deside jogu remata ho rezultadu 0:0.

Notísia relevante:Asosiasaun Futeból Bobonaro hahú jogu sub-22

Bainhira tama ba jogu segunda parte, ekipa Maliana United muda ninia ritmu jogu hodi halo atake makás iha liña oin, liu hosi jogadór avansadu ho númeru kamizola 9, maibé nafatin la kosege atinji alvu produsaun golu, tanba defeza Madiran FC halo monu iha área risku, ikus-mai árbitu deside fó oportunidade ba Maliana United atu marka penalidade iha minutu 48.

Iha oportunidade penalidade osan me’an ne’e, la konsege ezekuta ho di’ak hosi jogadór Rosalino dos Santos ho númeru 5, tanba bola aas liu guardiaun.

Adeptu hois ekipa rua hamanas liu tán situasaun jogu no konsege motiva Madiran FC atu hasa’e tán ninia ritmu jogu hodi halo atake makás liu tán iha liña eskerda, ikus-mai sira mós hetan oportunidade brilante, tanba defeza Maliana United halo monu jogadór avansadu Madiran FC iha área penalidade no ne’ebé ikus-mai jogadór Madiran Vladirimiro João dos Santos Amaral númeru 11, ezekuta penalidade konsege susesu fura rede Maliana United hodi muda rezultadu ba 1:0.

Ho rezultadu ne’e la hamate espíritu jogu hosi Maliana United, tanba sira hahú halo mudansa tékniku no pozisaun jogu modelu meiu kampu, maibé ikus-mai Madiran FC kosege hamate sira-nia avansadu, hodi la rezulta golu ruma to’o jogu termina iha minutu 90.

Ho rezultadu jogu ne’e maka ikus mai Maliana United tenke hadau fali terseiru no kuartu lugár no Madiran konsege avansa ba jogu finál.

Treinadór Madiran FC, Américo Lopez, kontente ho rezultadu ne’e no sei kontinua esfosu liu tán iha faze finál, hodi lori klube ne’e sai kampiaun.

“Ba oin sei kontinua treinu kona-bá tátika, maibé tenke treinu fíziku mak makás liu, tanba temperatura jogu manas liu halo jogadór-sira nia estamina tún. Maibé, ha’u fiar katak ami sei hatudu rezultadu di’ak atu bele sai kampiaun,” Américo Lopez  informa ba jornalista Agência Tatoli, iha estádiu Malibaka Yamato Maliana, kuarta ne’e.

Jogu ne’e lidera hosi árbirtu lokál, Jefrianos Loy Maia dos Santos, asistente daruak, Mateus Marques, asistente daruak, Lucas Felix, árbritu da-haat, Domingos Vicente.

Oráriu hosi Asosiasaun Futeból Bobonaro (AFB), katak, iha kinta (26/08) Momentu FC sei kontra Maria Tapo FC iha tuku 16:00 otl, iha estádiu Malibaka Yamato Maliana.

Notísia relevante:Jogu futeból iha Maliana, ema barak la kumpre protokolu saúde

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here