Reuniaun Konsellu Ministru, iha Palásiu Governu, kuarta (25/08). Imajen TATOLI/Egas Cristóvão

DILI, 25 agostu 2021 (TATOLI)—Governu liuhosi reuniaun Konsellu Ministru (KM) deside adia hikas Jogu Desportivu Komunidade País ho Lian Portugés (CPLP, sigla portugés) ba tinan 2024.

Desizaun ne’e ezekutivu sira foti hafoin asiste aprezentasaun hosi Ministru Edukasaun, Juventude no Desportu (MEJD), Armindo Maia no Sekretáriu Estadu Juventude no Desportu, Abrão Saldanha, kona-ba pontu situasaun ba preparasaun Jogu Desportivu CPLP ba da-XII, ne’ebé Timor-Leste mak sai uma-na’in ba eventu ne’e no sei hatun modalidade ualu

“Haree katak mantein preokupasaun, tanba ne’e Governu rekomenda hodi adia filafali jogu CPLP ba da-XII ba tinan 2024,” Ministru Prezidénsia KM, Fidelis Manuel Leite Magalhães, hateten, hafoin reuniaun ezekutivu iha Palásiu Governu, kuarta ne’e.

Antes ne’e, tuir planu eventu ne’e atu realiza iha Timor-Leste iha loron 10 to’o 22 jullu 2020, maibé tamba situasaun pandemia no hanesan eventu desportivu seluk nível mundiál, adia ba tinan 2022.

Governu autoriza ona orasamentu ho valór $511.250 ba Organizasaun Konferénsia Ministru Juventude no Desportu Komunidade CPLP no Jogu Desportivu CPLP ba da-XII.

Tuir informasaun, partisipante ne’ebé sei partisipa iha jogu desportivu ne’e hamutuk 1.000 hosi CPLP.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here