Koordenadór Gabineti Apóiu Sosiédade Sivíl, Filipe da Costa. Imajen Tatoli/Francisco Sony

DILI, 25 agostu 2021  (TATOLI)-Gabinete Primeiru-Ministru liuhosi Gabinete de Apoio Sociedade Civil (GASC), tersa ne’e, apoiu fundu hamutuk $34.080 ba Grupu Komunidade Beobeoan (G-KBOAN) Viqueque hodi instala bee-moos no konstrusaun hariis fatin públiku ba uma-kain hamutuk 107 ho totál populasaun 507 iha Munisípiu Viqueque.

Komunidade uma-kain 107 ne’ebé atu asesu ba bee-moos no hariis-fatin públiku ne’e iha aldeia rua hanesan Aldeia Rai-hun hosi Suku Uma-Kiik no Aldeia Fatu-hadan, Suku Uma Uain-Kraik, Postu Administrativu Viqueque Villa, Munisípiu Viqueque.

“Ha’u kontente tebes hodi apoiu finanseiru ba G-KBOAN hodi ajuda komunidade hodi instala bee-moos no hariis-fatin públiku tanba komunidade presiza apoiu sira ne’e, entaun hosi orsamentu $34.080 ne’e faze dahuluk, GASC transfere ona 40% ka ekivalente $13.632 ba grupu KBOAN hodi halo uluk perfurasaun, kanalizasaun no konstrusaun tanke reservoir-ida, bainhira ezekuta hotu mak GASC sei transfere tan orsamentu 60% ka ekivalente $20.448 hodi kontinua halo konstrusaun ba hariis fatin públiku, no kompleta kanalizasaun ba torneira públiku sira,” Koordenadór GASC, Filipe da Costa hateten liuhosi komunikadu imprensa ne’ebé Agência Tatoli asesu, kuarta ne’e.

Nia hatutan, objetivu apoiu finanseiru ba kanalizasaun bee-moos ne’e tanba atu evita tan komunidade atu kuru bee-moos iha mota-laran, atu hadi’a nutrisaun labarik sira liuhosi hadi’a asesu ba bee hemu-ida ne’ebé seguru tuir rezultadu komún Planu Asaun Konsolida Nasionál ba Seguransa Ai-han no Nutrisaun ne’ebé Primeiru-Ministru, Taur Matan Ruak rasik lansa ona iha loron 30 jullu liubá.

“Ha’u fiar katak bainhira konstrusaun remata, labarik, inan-feton sira, inan isin-rua inklui ema ho defisiénsia no komunidade jerálmente sei asesu bee-moos no sentina públiku hodi garante sira-nia moris saudavel no hadi’a nutrisaun, inklui halo to’os iha uma-hun atu kuda modo ba konsume, nomós bele aumenta uma-kain nia rendimentu,” nia dehan.

Koordenadór Jerál G-KBOAN, José de Araújo dehan, sira-nia parte kontente tanba Governu liuhosi GASC bele fó fiar ba sira hodi aprova sira-nia proposta hodi implementa planu Governu nian kona-ba fornesimentu bee-moos no konstrusaun hariis fatin-fatin públiku ba komunidade iha Suku Uma Kiik no Uma Uain-Kraik.

“Ha’u agradese ba koordenadór GASC ne’ebé disponivel hodi vizita dahuluk ami-nia projetu perfurasaun bee-moos. Ami tenke serbisu makaas liután hodi finaliza instalasaun ne’e, tanba tuir ami-nia tarjetu to’o dezembru nia rohan tenke ramata,” Koordenadór Jerál, Jose de Araújo hateten.

Nia afirma, iha konstrusaun refere sira sei harii tanke reservoir ida no torneira públiku ualu (8) no posibilidade liu ualu bainhira débitu bee ne’e makaas, fiar katak bainhira instalasaun ne’e ramata, komunidade bele asesu ona bee-moos maizumenus metru 10 to’o metru 100. Tanba ne’e komunidade no autoridade lokál entuziazmu tebes atu serbisu voluntária hodi instala bee-moos no futuru konstrusaun hariis-fatin públiku hamutuk ualu iha aldeia rua refere.

Fornesimentu bee-moos no hariis-fatin públiku ne’e hanesan pilár estratéjiku GASC nian ne’ebé kontribui ba sosiedade ida haksolok, inklui hasa’e rendimentu uma-kain, hadi’a nutrisaun no inseguransa ai-han, no restaurasaun ambiente sira.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here