Vigáriu Jerál Padre Francisco Pinheiro e Silva. Imajen TATOLI/Natalino Belo

BAUCAU, 25 agostu 2021 (TATOLI)—Prezidente Konferénsia Episkopál Timorense no atuál Bispu Dioseze Maliana, Don Norberto do Amaral, agradese ba dedikasaun Vigáriu Jeral Dioseze Baucau, Padre Francisco Pinheiro e Silva, ba uma-kreda Timor-Leste.

Prezidente Konferénsia Episkopál Timorense no atuál Bispu Dioseze Maliana, Don Norberto do Amaral. Imajen TATOLI/Natalino Belo

“Agradese ba dedikasaun Padre Francisco Pinheiro ne’ebé kontribui harii uma-kreda Timor-Leste liuhosi nia servisu, hahalok, no liafuan ne’ebé la’o lemorai, ikus mai ramata nia moris. Boa Viajem ba Vigáriu Jeral Dioseze Baucau, hanesan Nai bolu ita, Nia mos sei lori ita ba fatin ne’ebé promete ona ba Atan ne’ebé Nia hili,” Dom Noberto hateten iha seremónia funerál Padre Francisco Pinheiro, iha simitériu Padre Parokia Sao José, Villa nova, kuarta ne’e.

Notísia relevante: Padre Francisco Pinheiro nu’udar kakutak ba mudansa Dioseze Baucau

Vigáriu Jerál Padre Francisco Pinheiro e Silva hakotu iis iha loron tersa (24/08) madrugada.

Don Norberto konsidera Padre Francisco nu’udar istoriadór ne’ebé úniku iha uma-kreda Timor-Leste, ne’ebé hatene hakerek rasik nia istória durante tinan 58.

“Agradese ba Nai Maromak tanba hosi Nia laran ruak, haraik ba kreda Timor-Leste, ema di’ak ne’ebé servisu ho responsabilidade iha silénsio laran,” nia akresenta.

Nune’e, hodi naran Kreda Katólika, Don Noberto agradese ba família maski entrega ona Padre Francisco ba igreja, maibé nafatin akompanã to’o hakotu iis no tuir prosesu funerál.

“Ita lakon tebes ema ne’ebé di’ak, maibé distinu iha Maromak nia liman, ita laran luak saran Nia ba fali Maromak ne’ebé fó atu lori nia Atan Matebian hamutuk ho Anjo sira, hodi kreda Katólika Timor-Leste, ami-nia sentidu pézames ba imi hotu,” nia hatutan.

Iha fatin hanesan, reprezentante família, Mateus Tilman, hateten, família entrega ona Padre Francisco hahú kedas hosi semináriu ho sentidu konviksaun boot no urgullu katak família iha Amu lulik ida.

Seremónia funerál Vigáriu Jerál Padre Francisco Pinheiro e Silva, iha simiteiru Villa nova, Baucau, kuarta (25/08). Imajen TATOLI/Natalino Belo

“Hahú horiseik to’o ohin, ami família no igreja iha Dioseze Baucau senti triste tanba lakon Padre Francisco ne’ebé ita hanoin katak sei nafatin fó kontribuisaun barak ba igreja no sarani, maski ita hotu hadomi maibé Maromak hadomi liu no ohin nia fila ona ba mundu seluk,” Mateus hateten.

Nune’e, nia husu atu sarani no igreja hotu kontinua reza no halo misa ba Padre Francisco atu bele fiar metin katak Padre ne’e sei hetan fatin di’ak iha Maromak nia Kadunan.

Lori família nia naran, Mateus husu deskulpa ba Bispu na’in-tolu, Padre, Madre no sarani Dioseze Baucau, relasiona ho Padre Francisco Pinheiro nia hahalok, karik iha erru ruma durante moris hanesan saserdotál no ema.

“Ami husu ita hotu nia perdaun atu nia bele hetan fatin di’ak, ho fiar katak nia sei kontinua reza ba ita no igreja nia di’ak iha futuru,” Mateus dehan.

Molok realiza seremónia funerál ba Padre Francisco Pinheiro , halo misa iha Igreja Katedrál Santo António Villa antiga ne’ebé prezide hosi Bispu Dioseze Baucau, Don Basílio do Nascimento no akompanã hosi Arcebispu Dioseze Dili, Don Virgílio do Carmo no Bispu Dioseze Maliana, Dom Noberto, padre, madre, família, inklui sarani Dioseze Baucau.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here