Responsável Sentru Treinamentu Claret (CTC, sigla portugés)Salele hasai retratu hamutuk ho formandu sira. Imajen/Espesiál.

DILI25 agostu 2021 (TATOLI)—Sentru Treinamentu Claret (CTC, sigla portugés) Salele sei fó formasaun movel kona-ba agrikultura no hortikultura ba prizioneiru na’in25 iha Prizaun Covalima.

Formadór Sentru Treinamentu Claret (CTC) Salele, Domingos Maria Jose, hateten formasaun movel ne’e hanesan maneira ida atu ajuda prizioneiru sira hodi bele hetan abilidade no bele aplika iha sirania moris.

“Aminia maneira formasaun ne’e, tanba nia movel, entaun ami hala’o semana ida dala rua, iha  segunda no  sabádu, hosi dader tuku 08h00 to’o 17h00 lorokraik,” Domingos Maria Jose, hateten ba Agência Tatoli, liuhosi telefónika, kuarta ne’e.

Antes atu hala’o formasaun movel iha prizaun Covalima, sentru ne’e hato’o pedidu ba Sekretariu Estadu Formasaun Profesional Empregu (SEFOPE) hodi bele fó apoiu.

Oráriu formasaun, antes ne’e tenke aprezenta ba SEFOPE no daudaun ne’e atu halo formasaun kona-ba agrikultura liu-liu agrikultura nível I jerál no nível II hortikultura nian.

“Agrikultura iha nível I ne’e, sira aprende agrikultura jerál no iha nível II kona-ba hortikultura. Área hortikultura ne’e tuir pakote mak konabá oinsá kuda modo hanesan modo ne’ebé kolleta nia tahan, nia fuan no nia isin,” nia dehan.

Sentru ne’e mós iha formasaun kona-ba oinsá atu prodús aduvu orgániku, tanbá kuríkulu ne’ebé hosi parte INDMO aprova ne’e ba área ne’e duni, entaun tenke aplika maneira formasaun liuhosi teoria no prátika.

“Matéria ne’ebé ami fó liuhosi formasaun ne’e iha disiplina 22. Unidade jerál fó formasaun ba sira konabá oinsá aprende lían iha agrikultura nian, hanesan tetun, inglés, portugés, no maláiu. Alende ne’e, ami fó formasaun konabá oinsa utiliza ekipamentu seguransa nian iha servisu fatin, hanesan oinsá servisu ho luvas, botas, no sapatu,” nia informa.

Iha unidade jerál ne’e, sentru ne’e hanorin formandu sira oinsá servisu efetivu hodi fó hanorin konabá komunikasaun iha servisu fatin.

Iha ne’e, fo formasaun kona-ba oinsá prepara aduvu orgániku, pekuária nian hodi aprende kona-bá oinsá tau matan ba animal (manu, fahi, karau no bibi) no aprende kona-bá oinsá bali iha aihoris liu-liu aihoris ne’ebé ema bele han nia tahan de’it no aihoris ne’ebé ita han nia fuan no han nia isin. 

Tuir loloos, formasaun ne’e sei halo estájiu ba fulan rua maibé formasaun ne’e, CTC Salele halo ba prizioneiru sira entaun sira labele sai hosi prizaun, ho nune’e estájiu ne’e sira halo prova fali liuhosi saida mak sira aprende ona no sira koko mesak fali.

“Prova sira koko mesak, depois formadór sira halo observasaun. Hafoin ne’e, formadór rekomenda katak ema ne’e bele halo servisu mesak ona, tuir industria agrikultura nian,” nia dehan.

Nia dehan, tanbá sentru ne’e asina akordu iha semana daruak iha fulan agostu nian, entaun formasaun ne’e adia no sei hahú fali ba fulan setembru semana dahuluk nian.

Entretantu, totál fundu ne’ebé sekretariu Estadu Formasaun Profesional Empregu (SEFOPE) fó apoiu ba Sentru Treinamentu Claret (CTC) Salele hodi realiza formasaun movel hamutuk $7,355.00. 

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here