Ilustrasaun Kustura. Imajen/Espesiál.

DILI25 agostu 2021 (TATOLI)—Koordenadora Sentru Formasaun Komputer no Kustura (CFIC, sigla portugés) Fuiluro, Irman Ines Freitas Bartolo, hateten daudaun ne’e CFIC Fuiluro fó formasaun ba joven feto sira iha área kustura.   

“Objetivu hosi aminia formasaun kustura ne’e, atu hasa’e koñesimentu joven feto sirania koñesimentu kona-ba suku nian no prepara mós sira tama ba iha mundu servisu nian ho dignu,” Irman Ines Freitas Bartolo, hateten ba Agência Tatoli, liuhosi telefónika, kuarta ne’e.

Matéria ba formasaun iha área kustura nian, formandu sira mai koñese konabá ekipamentu suku nian no fó introdusaun ba sasán sira oinsá aprende halo “pola” ba vestidu nian.

“Iha área kustura nian, formandu sira aprende mós oinsá suku pontu kruz, bordadu no aprende mós suku roupa ba ema sira-ne’ebé mai pesan,” nia dehan.

Dadaun ne’e, formandu ne’ebé tuir formasaun ba área kustura nian hamutuk na’inrua (2) ne’ebé mai hosi munisípiu Ermera no Maliana.

Iha tinan ne’e, sentru ne’e iha mudansa uitoan tanbá iha situasaun pandemia COVID19, joven feto sira hamutuk na’in53 ne’ebé sira la fila ba uma tanbá sira hela iha asrama.

“Iha momentu ne’ebá oportunidade furak liu ba ami mak, sira hosi janeiru to’o fulan ne’e formasaun ba sira full liu. Ne’e hanesan ami fó tempu barak liu ba sira, hodi hanorin sira teoria no prátika ba sira. Entaun, ne’e hanesan sira hetan oportunidade di’ak ne’ebé ami fó ba sira,” Koordenadora CFIC Fuiluro ne’e hateten.

Sentru ne’e estabelese iha tinan 2002 ho objetivu atu hatán ba foinsa’e sirania presiza, hanesan sira-ne’ebé la hetan servisu, ho nune’e sentru ne’e prepara formandu sira atu tama iha mundu servisu nian ho dignu ho responsabilidade.

Iha tinan 2002 to’o 2021 formandu na’in900 mak tuir formasaun iha CFIC Fuiluro no hosi númeru ne’e 50% mak hetan ona servisu iha instituisaun Governu no balun sai alfaiate.

Totál funsionáriu no formadór hamutuk na’insia (9). Totál formandu ne’ebé tuir formasaun ba tinan ne’e hamutuk na’in53, ne’ebé kompostu hosi administrasaun na’in51 no na’inrua hosi kustura nian.

Jornalista : Nelia Fernandes

Editór       : Cancio Ximenes

 

HAKEREK NO HATÁN

Please enter your comment!
Please enter your name here