Mate-isin, soldadu, Júlia da Conceição (29) hosi Komponente Navál F-FDTL. Imajen facebook.

DILI, 25 agostu 2021 (TATOLI)—Xefe Estadu Maiór Jenerál  FALINTIL-Forsa Defeza Timor-Leste (F-FDTL), Tenente Jenerál, Lere  Anan Timur, lori instituisaun nia naran, hato’o sentidu kondolénsia ba família, relasiona ho asidente iha suku Nunu Moge, postu administrativu Hatubuiliku, munisípiu Ainaro, ne’ebé  rezulta membru na’in-ida mate no na’in-lima kanek.

“Asidente ne’e nu’udár tristeza bo’ot ida ba instituisaun ne’ebé lakon membru di’ak ida. Tanba ne’e, nu’udár líder instituisaun lori naran F-FDTL, hato’o sentidu lutu ba familia,” Lere Anan Timur, hateten ba jornalista-sira liuhosi konferénsia imprensa iha Kuartél Jenerál F-FDTL, Fatuhada, kuarta ne’e.

Notísia relevante:Dezastre iha Ainaro, membru F-FDTL ida mate no lima kanek

Daudaun-ne’e, mate-isin soldadu Júlia da Conceição (29)  rai-hela iha nia moris fatin Ainaro no tuir ajenda sei hatoba kalan ida ho família, kalan ida ho komponente Navál, ikus liu sei ba haloot iha Jardim Simitériu militár.

Komandu  F-FDTL, sei kumpre estatutu militár-nian hodi tau-matan prosesu funerál tomak.

Kona-bá membru na’in-lima  ne’ebé  kanek, dadaun ne’e sei hala’o tratamentu intensivu  iha Ospitál  Referál Maubisse ne’ebé sei transporta mai HNGV.

Parte Komandu mós sei halo investigasaun kona-bá kauza hosi asidente ne’e, tanba neglizénsia kondutór ka karreta mak laiha kondisaun.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here