Karreta kontentór ne’ebé polisia Tránzitu halo apreensaun tanba viola orariu sirkulasaun, oras ne’e para hela iha Komandu PNTL Caicoli, tersa (24/08/21). Imajen Tatoli/Nelson de Sousa.

DILI, 24 agostu 2021 (TATOLI)—Polísia Nasionál Timor-Leste (PNTL), munisípiu Dili liuhosi Unidade Tránzitu, halo apreensaun ba karreta kontentór ida ho xapa matríkula 60.466, tanba viola oráriu sirkulasaun.

Karreta kontentór ne’e hosi kompañia estranjeiru ida ne’ebé halo sirkulasaun iha loron 23 agostu, tuku 12:00 otl.

Notísia relevante:Polísia aplika ona koima ba karreta kontentór ne’ebé viola oráriu sirkulasaun

“Karreta agora para iha edifísiu komandu, ita aplika multa hodi ba selu direta iha banku, hafoin entrega fila-fali ba kompañia,” Komandante Polísia Tránzitu munisípiu Dili, Inspetór, Domingos Sarmento Gama, hateten ba jornalista-sira iha nia kna’ar fatin, Caicoli, tersa ne’e.

Husu ba kompañia ne’ebé iha karreta kontentór atu kumpre nafatin  despaixu konjuntu Governu liu hosi  Ministériu Transporte Komunikasaun (MTK) ho Ministériu Interiór (MI), ba oráriu sirkularasaun hodi evita engarafamentu iha Dili.

Tanba ne’e, polísia kontinua halo operasaun iha estrada públiku bainhira sirkulasaun la kumpre oráriu ne’e maka, sei prosesa hodi aplika multa.

Despasu konjunta MTK ho MI, inklui entidade relevante, oras ne’ebé kontentór labele sirkula maka hahú tuku 7:00-9:00 dadeer, tuku 12:00-14:00 lokraik no tuku 17:00-21:00 kalan, bainhira la kumpre sei hetan sansaun multa másimu $75.00.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here