Primeiru-Ministru, Taur Matan Ruak ho membru Governu relevante debate kona-ba pedidu estensaun ba deklarasaun Estadu Emerjénsia hosi Prezidente Repúblika, iha sala plenária Parlamentu Nasionál, tersa (24/08). Imajen TATOLI/Egas Cristóvão

DILI, 24 agostu 2021 (TATOLI)—Primeiru-Ministru (PM), Taur Matan Ruak, apela ba entidade tomak hodi renova esforsu luta hasoru COVID-19 variante foun ne’ebé ho nível kontájiu maka’as tebes, tanba Governu presiza envolvimentu entidade tomak hodi kombate moras ne’e.

“Ha’u apela renova esforsu sira, mobiliza povu no nasaun ba nesesidade atu enfrenta hamutuk inimigu ne’ebé fó ameasa ba moris oan sira no hosi ema sira ne’ebé ita hadomi. Iha semana ikus ne’e, ita haree avansu preokupante variante Delta Coronavírus, ne’ebé espesialista sira konsidera kontajioza tebes,” PM bolu atensaun entidade hotu, iha ámbitu debate renovasaun Estadu Emerjénsia ba dala-XVII iha sala plenária Parlamentu Nasionál, tersa ne’e.

Xefe Governu hato’o kestaun ne’e tanba hahú semana kotuk, mosu evolusaun moras COVID-19, liuliu iha kapitál nasaun Dili, ne’ebé kada loron rejista númeru infetadu atinje ema 80 ba leten, ho dadus ikus iha loron 23 agostu, númeru detetadu foun iha oras 24 nia laran hamutuk 187, rekuperadu 67, óbitu ida, ho kazu ativu 3.383, rekuperadu 10.971, kazu konfirmadu ne’ebé rejista hahú 20 marsu 2020 to’o agora hamutuk 14.403, óbitu rejistadu 49.

Notísia relevante: COVID-19: óbitu ida, pozitivu 187 no ativu 3.383

Aleinde ne’e, hosi parte Sala Situasaun, Sentru Integradu Jestaun Krize (CIGC, sigla portugés) fó sai ona katak amostra ne’ebé manda ona ba laboratóriu uha Austrália, iha balun identifikadu hanesan variante Delta.

Maski nune’e, Governu nafatin fó sai medida foun hodi kombate variante foun vírus, hodi haforsa nesesidade hodi mantein nafatin medida vijilánsia no prevensaun, hanesan uza máskara, fase liman beibeik, halo distansiamentu fíziku, no vasinasaun ne’ebé sei konsidera hanesan instrumentu fundamentál atu kombate moras ida-ne’e.

Governu akompaña ho atensaun espesiál, evolusaun situasaun iha nível rejionál no internasionál, hanesan iha país dezenvolvidu sira balun hanesan Estadu Unidu Amérika (EUA) ne’ebé daudaun ne’e retoma apelu ba nesesidade urjente atu halo vasinasaun ba sidadaun sira inklui iha país seluk.

“Governu husu ita labele ignora debate internasionál ne’ebé defende ba beibeik nesesidade halo vasinasaun masál ne’ebé refere ba COVID-19, tanba ita sei la halakon iha tempu badak. Iha fulan hirak ikus, iha país balun, ita haree laiha ona preokupasaun hodi hakotu medida ba prevensaun no daudaun país hirak-ne’e filafali ba medida prevensaun tanba mosu variante Delta ne’ebé agresiva no kontajioza liu, hosi kedas identifikasaun vaga dahaat COVID-19 iha Índia, hosi Organizasaun Mundiál Saúde (OMS),” PM haktuir.

Governu esforsu halo kampañ vasina

Governu mós rekoñese, iha momentu ne’e, país sira ne’ebé ho índise vasinasaun kiik liu iha risku boot hodi hasoru variante mortál ne’e, tanba ne’e halo esforsu hodi atinje meta vasinasaun ba populasaun elijível ho 70%.

Maski nune’e, to’o agora Governu bele nota katak sidadaun sira ne’ebé tanba ta’uk sein justifikasaun ka tanba alegada konxiénsia kulturál, relijioza ka polítika, lakohi simu vasina no ikus mai mosu perigu ba an rasik tanba expansaun variante delta foun ne’e.

“Sientifikamente iha prova ona katak vasina nu’udar meiu efikás prevene kazu ne’ebé todan liuhosi moras ne’e, hodi aumenta posibilidade evita risku mate. Ta’uk sira ne’ebé persiste iha sidadaun no família balun nia hanoin tuir ami-nia hatene, laiha justifikasaun tanba destaka de’it efeitu kolaterál no la mensiona katak risku sira ne’ebé iha sei kiik, bainhira kompara ho benefísiu boot ne’ebé ita hetan bainhira vasina ona kontra moras ne’e,” PM Taur  haktuir.

Tuir dadus kona-ba progresu imunizasaun COVID-19, to’o loron 24 agostu, totál vasina ne’ebé fó ona iha Timor-Leste tomak hamutuk 544.175, kompostu hosi doze dahuluk 370.300 (49,1%) no doze daruak 173.875 (23%).

Enkuantu, iha Dili, totál vasina ne’ebé fó ona hamutuk 272.399, kompostu hosi doze dahuluk 155.588 (72,8%) no doze daruak 116.811 (54,6%).

“Ho ida ne’e, Governu konsege muda situasaun grave ne’ebé eziste iha munisípiu Dili, ne’ebé iha episentru propagasaun moras, hodi investe iha vasinasaun masál, tanba ne’e permite ami agora atu asegura besik 53% populasaun ho doze daruak vasina no populasaun 72% simu ona doze dahuluk,” PM subliña.

Ba kestaun vasina, Xefe Governu otimista iha tempu badak iha sidade kapitál sei atinje imunidade 80% atu hasoru futuru ho esperansa foun ida, ho planu nasionál vasinasaun la’o ho ritmu di’ak iha munisípiu no rejiaun hotu-hotu, liuliu ho implementasaun estratéjia foun hodi foka maka’as ba munisípiu no rejiaun sira ne’ebé iha risku propagasaun boot liu, iha fronteira terrestre, no iha fatin sira ne’ebé surtu grave eziste ona.

“Timor-Leste iha vasina sufisiente hodi kobre ita-nia populasaun adulta tomak no ami prepara hela servisu sira ba vasina Pfizer to’o mai, ne’ebé fó liuhosi sistema COVAX sei permite vasina ba ita-nia labarik sira hahú hosi idade 12,” PM Taur afirma.

To’o loron 16 agostu ne’e, Timor-Leste simu ona vasina hamutuk doze 982.380 hosi parseiru, kompostu hosi COVAX 1.800, Nova Zelándia 24.000, Xina 100.000, Austrália 577.580, Portugál 12.000, no Japaun 160.000.

Nune’e, kona-ba vasina ne’ebé a’at, Governu rekoñese no halo ona koordenasaun interdepartamentál no interministeriál, maski falla balun iha nafatin.

Ba kontestu atuál, Governu kontinua nafatin vijilante no prepara normalidade ba futura ho planu ida atu sai hosi pandemia hodi aposta iha retoma ba moris sósio-kulturál no iha rekuperasaun atividade ekonómika sira.

Biban ne’e, Xefe Governu fó solidaridade ba vítima mortál COVID-19, ne’ebé rejistadu hahú tinan kotuk to’o agora hamutuk 49.

“Ita tanis ba vítima mortál sira no ita transmite ita-nia konsolu ba família afetada ka família enlutada sira hotu, no ita renova ita-nia firme determinasaun atu kontinua kombate moras ne’ebé ameasa ita-nia família nia futuru,” PM tenik.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here