Komunidade kontinua simu vasina AstraZeneca iha Sentru Saúde sira. Imajen Tatoli/António Gonçalves.

MANATUTO, 24 agostu 2021 (TATOLI)-Ministériu ba Asuntu Parlamentár no Komunikasaun Sosiál (MAPCOMS-sigla portugés), tersa ne’e, halo lansamentu programa kampaña vasina ba faze da-toluk nian iha Munisípiu Manatuto.

Ministru ba Asuntu Parlamentár no Komunikasaun Sosiál, Francisco Martins da Costa Pareira Jerónimo, hateten kona-ba vasina planu VIII Governu Konstitusionál nian mak oinsá halo kampaña maka’as kona-ba vasinasaun nian ba komunidade tomak iha territóriu nasionál, tanba mundu tomak inklui Timor-Leste daudaun ne’e hasoru situasaun COVID-19 aumenta tan variante foun Delta.

“Husu komunidade Manatuto tomak liuhosi lansamentu programa kampaña vasina faze da-toluk nian ne’e tenke simu vasina tanba vasina mak sai xave importante ba imunidade iha tempu situasaun pandemia COVID-19 ida ne’e,” Francisco Martins da Costa Pareira Jerónimo hateten iha nia diskursu ba serimónia programa lansamentu COVID-19 ba da-toluk nian iha Sentru Saúde Munisípiu Manatuto.

Nia hatutan, komunidade tenke simu vasina tanba vasina mak dalan ida ne’ebé di’ak liu fó imunidade ne’ebé di’ak ba ema-nia Saúde hodi hasoru propagasaun COVID-19 iha mundu liu-liu iha rai Timor-Leste.

“Ita ko’alia kona-ba ba vasina ita foin to’o faze daruak maibé nasaun seluk hahú hanoin ona ba faze da-tolu nian tanba vasina mak dalan úniku atu hasoru COVID-19, tanba ne’e Governu nafatin iha kompromisu hamutuk ho ekipa saúde liña frente no entidade hotu hodi lori vasina ne’e ba komunidade tanba imunidade ne’e importante. Tanba ne’e ita hakarak hamosu imunidade komunitária iha ida-idak nia hela fatin,” nia hatutan.

COVID-19 sei la ramata maibé bainhira simu vasina iha imunidade ne’ebé forte bele moris hamutuk ho COVID-19, nune’e atu atinje planu VIII Governu nian komunidade simu vasina atinje 80% ne’e, servidór Estadu iha obrigatóriu atu simu vasina nune’e fó protesaun ba sira seluk no sai hanesan ezemplu ba komunidade, nune’e lori povu ba salvasaun.

Diretora Jerál Prestasaun Saúde, Ministériu Saúde, Odete Viegas da Silva, hateten kona-ba vasinasaun Ministériu Saúde labele servisu mesak, maibé presiza tulun hosi entidade hotu, liña Ministeriál, Sosiedade Sivíl inklui komunidade hodi bele kombate moras COVID-19 iha Timor-Leste.

“Atu hapara moras refere mak nia dalan simu vasina ha’u husu ba komunidade ne’ebé seidauk simu vasina hakbesik ba sentru vasinasaun hodi simu vasina no sira ne’ebé simu ona doze dahuluk halo kompleta simu vasina doze daruak nune’e imunidade bele forte hasoru COVID-19,” Odete Viegas da Silva hateten.

“Tanba ne’e durante loron Sanulu ba Programa kampaña vasina ba faze da-tolu, ita-nia ekipa tékniku Saúde hosi nasionál rasik durante mai akompaña pesoál saúde Manatuto hahú ohin lansamentu to’o 03/09 2021 tun ba suku 31 iha Manatuto halo kampaña vasina no fó vasina ba komunidade, nune’e ita bele alkansa ba to’o tarjetu ne’ebé ita hotu espera tanba Manatuto to’o agora ema ne’ebé simu ona vasina doze dahuluk atinje 40% ba doze daruak atinje10%,” nia dehan.

Administradór Munisípiu Manatuto, Bernardo Lopes afirma, liuhosi lansamentu programa kampaña vasina faze da-toluk ba idade hahú hosi tinan 18 ba leten ne’ebé foin halo ne’e ba oin nu’udár administradór  ne’ebé reprezentante Governu Sentrál iha Munisípiu esforsu  ne’ebé sei halo mak ekipa Munisípiu nian ne’ebé hetan apoiu hosi nasionál hahú aban (25/08) ba leten sei tun ba suku 31 iha Manatuto halo vasina ba komunidade.

“Ita fiar katak liuhosi lansamentu vasina ba da-tolu nian ne’e númeru vasina sei aumenta tanba hahú ohin ba oin durante loron Sanulu ita-nia ekipa tékniku COVID-19 nian hamutuk ho nasionál sei tun halo sosializasaun no fó vasina ba ita-nia komunidade,” nia dehan.

Komandante Polísia Nasionál Timor-Leste (PNTL) Munisípiu Manatuto, Superintendente João da Costa hateten, hanesan parte seguransa sira nafatin fó apoiu ba parte saúde liu-liu ekipa ne’ebé durante loron sanulu sei tun ba suku sira halo sosializasaun no fó vasina ba komunidade.

“Atu nune’e ita-nia inan-aman komunidade, ne’ebé sei menus informasaun seidauk partisipa vasina sira bele tuir vasina tanba ita mak liman ain Estadu nian servisu hamutuk nune’e programa sira ne’e implementa iha terrenu ho di’ak,” nia dehan.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here