Progresu konstrusaun UKL iha Suku Lahomea, Postu Administrativu Maliana, Munisípiu Bobonaro, segunda (09/08). Imajen Tatoli/Sérgio da Cruz.

DILI, 24 agostu 2021 (TATOLI)—Diretora Sekretariadu Tékniku Programa Nasionál Dezenvolvimentu Suku (ST-PNDS), Claudina Soares Pinto, hateten ninia parte kontinua halo esforsu hodi konstrui Uma ba Kbiit Laek (UKL) sira iha territóriu Timor-Leste (TL), maske hasoru difikuldade iha tempu pandemia no kestaun sira seluk.

“Munisípiu ne’ebé ninia pursentu sei kiik ne’e tanba pandemia Covid-19 ne’ebé labele halo movimentasaun barak”, Diretora PNDS ne’e hateten ba Ajénsia TATOLI, iha nia knaar fatin, Colmera, Dili, segunda ne’e.

Nia hatutan: “Munisípiu parte leste kontinua udan no laiha tempu ne’ebé di’ak atu halo prosesu aprovizionamentu, ne’ebé sai hanesan obstakulu ba kompañia fornesedór ba materiál konstrusaun hodi lori ba munisípiu to’o lokál, tanba ne’e, ha’u dehan ida-ne’e sai difikuldade ba ami atu halo konstrusaun”.

Notísia Relevante: Konstrusaun ‘Uma Kbiit Laek’ iha munisípiu 12 atinje ona 25%

Diretora ne’e informa munisípiu Aileu atinje ona 15%, Ainaro 3%, Baucau 20%, Bobonaro 3%, Covalima 1.5%, Dili 14%, Ermera 6,75%, Lautém 9%, Liquiça 20%, Manatuto 8%, Manufahi 24%, RAEOA seidauk halo konstrusaun no Munisípiu Viqueque 15,03 %, totál foin atinje 11,90%.

Iha Rejiaun Administrativa Espesiál Oé-Cuusse Ambeno (RAEOA) to’o agora seidauk halo konstrusaun ba “Uma Kbiit Laek” tanba implementa hela konfinamentu obrigatóriu, entaun atividade hotu-hotu liga ho konstrusaun “Uma Kbiit Laek” labele la’o, maibé situasaun normal fila-fali mak ekipa PNDS kontinua fali halo kontrusaun.

Problema seluk, nia informa, estrada rurál ne’ebé iha benefisiáriu nia hela fatin mós ladi’ak, tanba ne’e mak atividade konstrusaun ‘Uma Kbiit Laek’ labele la’o.

Notísia Relevante: Governu hahú ona konstrui “Uma Kbiit Laek” 1.254 iha territóriu nasionál

Ezemplu, nia dehan, suku balun iha Ossu liu-liu iha Uatucarbau-Viqueque iha suku tolu ne’ebé seidauk no susar tebes atu halo konstrusaun ba ‘Uma Kbiit Laek’, kauza hosi udan ne’ebé monu-rai loron-kalan.

Atu pursentu ba konstrusaun ‘Uma Kbiit Laek” ne’e sa’e, nia husu ba populasaun sira tenke simu vasina kompleta hotu, tanba maske la responde direta maibé liuhosi vasina bele asegura no aumenta imunidade no labele fó risku tékniku sira-ne’ebé konstrui ‘Uma Kbiit Laek’ iha terrenu.

”Se ida-ne’e mak akontese mak ami-nia ekipa PNDS sei kontinua halo servisu. Tanba, ha’u lakohi fó risku ba ha’u-nia funsionáriu sira,” nia dehan.

Notísia Relevante: Implementasaun konstrusaun “Uma Kbiit Laek” ho pakote millaun $34

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here