Membru Parlamentu Foinsa'e realiza Plenaria Dahuluk Parlamentu Foinsa'e nian iha periodu ba da 4 nian iha tinan 2019-2022 nian. Iha salaun Palasiu Nobre Lahane, tersa (24/08). Imajen Tatoli/Francisco Sony.

DILI, 24 agostu 2021 (TATOLI)—Sekretáriu Estadu Juventude Desportu (SEJD), Abrão Saldanha, hateten juventude mak sai ajente transformadór ba mudansa sosiedade iha futuru

Notísia Relevante: http://www.tatoli.tl/2021/08/24/apftl-realiza-plenaria-dahuluk-pfn-periodu-2019-2022/

“Ha’u-nia ba esperansa boot ba juventude sira tanba sira mak atu sai ajente transformadór mudansa iha sosiedade nia-laran iha futuru ne’ebé atu mai,” Abrão Saldanha hateten ba jornalista sira, bainhira partsipa Plenária Dahuluk ba Membru Parlamentu Foinsa’e sira periódu 2019-2022, iha Lahane, Dili, tersa ne’e.

Sekretáriu Estadu Juventude Desportu hato’o lia-tatoli ba juventude sira hotu iha Timor-Leste atu aproveita oportunidade ne’ebé Governu hamutuk ho Ajénsia sira kria ona hodi dezenvole-an.

“Ha’u fó mensajén ba juventude sira atu aproveita oportunidade no espasu ne’ebé mak Governu ho ajénsia kria hodi modera sira-nia an, hodi sai joven ne’ebé mak sensível ba problema sosiál ekonómika iha ita-nia rai-laran,” nia dehan.

Reprezentante UNICEF iha Timor-Leste, Bilal Aurang Zeb Durrani, hateten UNICEF sente kontente tanba ajuda Governu hodi estabelese Parlamentu Foinsa’e Timor-Leste (PFTL) iha 2009, no UNICEF servisu hamutuk ho SEJD sei kontinua apoiu membru PFTL iha treinamentu oioin.

“Membru PFTL hetan treinamentu kada tinan. Tanba ne’e, mak ami hanoin katak ita persija dezenvolve kuríkulu ida-ne’ebé mak ho estandar atu ajuda membru Parlamentu Foinsa’e hirak ne’e kona-ba hanoin ne’ebe krítiku no mós isu sira seluk iha parte edukasaun no problema seluk ne’ebé mak ida-idak hasoru iha ninia munisípiu rasik. Ho estabelesimenu kuríkulu ne’ebé mak apropriadu, sei ajuda formasaun ho sistemátiku ba membru sira-ne’e kada tinan,” Durrani dehan.

Koordeandór Parlamentu Foinsa’e, Andre José Sarmento Paulo, hateten atividade ohin nu’udar plenária dahuluk ba Parlamentu Foinsa’e nian ba períodu haat (IV) ho objetivu atu halo diskusaun kle’an ba asuntu liga ho joven no edukasaun iha kada munisípiu sira-ne’ebé mak sira identifika ona.

“Objetivu mak ami atu diskute kona-ba problema ne’ebé mak ami identifika iha ami ida-idak nia postu ne’ebé ami reprezenta ba. Hanesan liga joven ho edukasaun, juven ho moris saudável, joven ho empregu no integridade, joven ho asuntu violénsia no krime no mós joven iha partisipasaun sívika. Maibé antes ne’e, ami liu ona atividade lubuk ida durante semana ida nia-laran,” koordenadór ne’e hateten.

Antes ne’e sira tuir formasaun sira kona-ba oinsá iha tékniku hodi halo debate no public speaking, hafoin halo enkontru bankada no kontinua enkontru entre komisaun, nune’e ohin loron realiza plenária ba dahuluk nian.

Atividade ne’e SEJD mak realiza no iha espasu ida-ne’ebé mak Governu kria liuhosi rezolusaun Governu númeru 23/2007, ne’ebé hatuur iha ne’ebá hodi fó espasu ba foinsa’e sira ba aprende nian no planu ne’e rasik apoiu hosi Governu ho montante orsamentu $43.000.

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here