Xefe Bankada FRETILIN, Francisco Miranda Branco. Imajen Tatoli/Egas Cristovão

DILI, 24 agostu 2021 (TATOLI)—Bankada Frente Revolusionária Timor-Leste Independente (FRETILIN) rekomenda ba VIII Governu Konstitusionál tenke prepara uluk kondisaun molok aplika konfinamentu obrigatóriu iha kapitál Dili no munisípiu sira-ne’ebé baliza ho Indonézia.

Notísia Relevante: CICG rekomenda Governu aplika hikas konfinamentu obrigatóriu iha kapitál Dili

“Ami rekomenda ba VIII Governu, karik dekreta konfinamentu obrigatóriu iha kapitál Díli no iha munisípiu sira iha fronteira ho Indonézia hodi kombate propagasaun variante foun, presiza halo uluk avizu ba populasaun sira hodi prepara sira-nia an. Nune’e mós, Governu presiza prepara kondisaun lojístika ruma molok dekreta medida konfinamentu obrigatóriu,” Xefe Bankada FRETILIN, Deputadu Francisco Miranda Branco, hato’o deklarasaun polítika iha estensaun estadu emerjénsia ba dala-XVII, iha uma fukun, tersa ne’e.

Tanba, tuir nia, populasaun baruk no kolen ona ho situasaun ida-ne’e, ho tan polítiku sira balun ne’ebé politiza moras pandemia mundiál ida-ne’e, tanba sira-nia hanoin no sira-nia pensamentu ‘post power syndrom’.

Ho situasaun ida-ne’e, Bankada FRETILIN haree katak profisionál saúde sira mós dezgastadu ho karga orária serbisu nian tanba númeru infetadu ne’ebé aumenta loron ba loron.

“Oinsá mak ita hotu hanesan povu, nu’udar mós hanesan nasaun bele kontribui lisuk ho hanoin pozitivu, konstrutivu, no hahalok atu lalais normaliza situasaun ida-ne’e no lailais hasai karga serbisu profisionál saúde sira-nian hodi fó mós tempu ba sira-nia an no ba sira-nia família,” nia dehan.

Deklarasaun Bankada FRETILIN ne’e relata, atu fila ba normalidade ho prezensa COVID-19 nafatin iha sosiedade, ema hotu presiza kompleta vasina, hatoman-an mantein distánsiamentu sosiál, fase-liman beibeik no uza máskara.

Maibé, nia dehan, ho vasina hirak ne’e seidauk sufisiente tanba bainhira ita-nia oan sira ho idade menus hosi idade 18 seidauk simu mós vasina.

Tanba ne’e, Bankada FRETILIN rekomenda ba Governu atu aselera prosesu akizisaun no vasina ba populasaun ho ‘faixa etária’ tinan 12-17, ne’ebé reprezenta ‘faixa etária’ boot liu ne’ebé sai futuru responsável ba nasaun ida-ne’e.

Bankada FRETILIN sujere ba Governu atu hapara temporariamente prosesu ensinu-aprendizajen hodi evita aumentu númeru kontájiu iha ‘faixa etária’ ida-ne’e.

Aleinde ne’e, Bankada FRETILIN apela mós ba EDTL.IP atu proativu liután hodi garante eletrisidade 24 oras ba Hospital Nacional, SAMES, no ba fatin Izolamentu sira-ne’ebé halo konta ba kazu ho gravidade.

Iha oportunidade ida-ne’e, Bankada FRETILIN espresa sentimentu kondolénsia ba família sira-ne’ebé lakon sira-nia ema, membru família nian hosi pandemia COVID-19 ne’ebé tuir relatóriu ikusliu hamutuk ema na’in-48.

Bankada FRETILIN hakarak mós presta omenajen ba profisionál saúde no ema hotu-hotu ne’ebé serbisu no sakrifika sira-nia an ba povu no ba nasaun nia prosperidade.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here