Administradór Munisípiu Covalima, Francisco de Andrade. Imajen Tatoli/Celestina Teles

COVALIMA, 24 agostu 2021 (TATOLI) – Administradór Munisípiu Covalima, Francisco de Andrade, husu ba abitante ne’ebé seidauk asesu estrada  ho di’ak atu  pasiénsia tanba Governu sei rezolve hotu kondisaun estrada sira iha territóriu Timor-Leste.

“Ha’u  rasik liga ona ba Institutu Jestaun ba Ekipamentu (IGE, sigla portugés)  tanba ekipamentu pezadu IGE Covalima limitadu, oras ne’e IGE hela iha Aldeia  Teda, Suku Beco,” Francisco de Andrade hateten ba Agência  Tatoli iha edifísiu Administrasaun Covalima, tersa ne’e.

Francisco hatutan, kondisaun estrada la di’ak difikulta abitante atu transporte material konstrusaun hanesan implementasaun Programa Nasional Dezenvolvimentu Suku  (PNDS), konstrui uma ba kbiit laek (UKL) no lori produtu lokál ba merkadu.

Maske durante ne’e administrasaun munisipál Covalima simu proposta hosi xefe suku sira  ne’ebé hato’o preokupasaun hosi abitante kona-ba  la asesu estrada ho di’ak, maibé abitante tenke pasiénsia hein tanba Governu sei responde tuir faze no prioridade.

Xefe Aldeia Makous, Suku Taroman, Postu Administrativu Fatululik,  Francisco da Cruz hateten, Governu presiza hadi’a estrada ba  abitante tanba abitante sira atu lori produtu lokál ba iha merkadu susar tebes asesu transporte.

“Ami hato’o ona proposta ba iha munisípiu maibé to’o ohin loron seidauk iha resposta. Ami nafatin ezije ba Governu atu hadi’a estrada, nune’e fasilita abitante fa’an produtu lokál iha merkadu,” Francisco tenik.

Jornalista   : Celestina Teles

Editór        : Francisco Simões

HAKEREK NO HATÁN

Please enter your comment!
Please enter your name here