Primeiru-Ministru, Taur Matan Ruak ho membru Governu relevante debate kona-ba pedidu estensaun ba deklarasaun Estadu Emerjénsia hosi Prezidente Repúblika, iha sala plenária Parlamentu Nasionál, tersa (24/08). Imajen TATOLI/Egas Cristóvão

DILI, 24 agostu 2021 (TATOLI)–Primeiru-Ministru (PM), Taur Matan Ruak, asina ona dokumentu ida atu husu pedidu ba Governu australianu hodi apoia rekursu umanu no lojístika hodi kombate COVID-19, liuliu atendimentu kazu grave.

“Ha’u bele hateten katak ita iha risku atu ita-nia sistema saúde ne’e kolapsu, tanba ne’e ha’u horiseik asina dokumentu ida no husu pedidu ba Primeiru-Ministru Austrália atu ajuda ita-nia rekursu umanu no mós lojiztika,” PM hateten iha ámbitu diskusaun renovasaun Estadu Emerjénsia ba dala-XVII iha sala plenária Parlamentu Nasionál, tersa ne’e.

Ho apoia sira ne’e, Austrália envolve apoia Timor-Leste hodi harii Laboratóriu Nasionál no vasina.

“Provavelmente ita presiza rekursu umanu hanesan espesialista hodi maneja ventiladór ne’ebé ladún iha risku boot ba sira ne’ebé uza. Númeru kazu aumenta drastikamente, ita iha rezerva kama haat ka lima de’it, signifika na’in-lima tan ba seluk ne’e idaidak iha ona no tau oksijéniu karik ha’u lahatene, entaun iha risku eminenti. Seluk mak profisionál saúde sira barak infetadu, entaun prátikamente laiha subtituisaun hasoru difikuldade no semana rua ne’e númeru óbitu mós maka’as loos,” Xefe Governu  haktuir.

Nune’e, Xefe Ezekutivu kompromete katak Governu tenta ho kbiit ne’ebé iha hodi luta kombate COVID-19 iha Timor-Leste.

“Ami konsiente situasaun ne’e no ami tenta posivel atubele fó kontribuisaun tuir kbiit ne’ebé própriu Estadu iha, tanba ita la halo milagre kuandu ita rasik laiha kondisaun. Naturalmente ita hotu akompaña surpreza ba tipu moras ida ne’e,” nia akresenta.

Iha parte seluk, Governu konsiente ho krítika sira no halo buat ne’ebé bele halo, nune’e kontinua nafatin salva vida sidadaun tanba realmente sira ne’ebé iha esperiénsia ona sente katak buat ne’e dolorozu demais ba ema.

Nune’e, Governu kompromete kontinua nafatin serbisu ho populasaun, sosiedade polítiku hotu, liu-liu reprezentante povu atu minimiza risku, konsolida vitória no avansa ba oin hodi fó kontribuisaun atu salva umanidade iha momentu difisil sira hanesan agora.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here