Primeiru-Ministru, Taur Matan Ruak ho membru Governu relevante debate kona-ba pedidu estensaun Estadu Emerjénsia hosi Prezidente Repúblika, iha sala plenária Parlamentu Nasionál, tersa (24/08). Imajen TATOLI/Egas Cristóvão.

DILI, 24 agostu 2021 (TATOLI)–Reprezentante Povu iha uma fukun Parlamentu Nasionál, husu Governu atu reforsa seguransa iha fronteira tanba ida-ne’e sai hanesan fatór determinante hodi luta kontra surtu COVID-19 no variante Delta.

Notísia Relevante: PM hakarak koloka Forsa Armada iha fronteira terrestre

Bankada Partidu Demokrátiku (PD), Deputada Elvina Sousa de Carvalho, husu Governu ezekuta estensaun estadu emerjénsia ho rigorozu hodi prevene númeru kazu pozitivu COVID-19 no variante foun Delta COVID-19.

 “Husu ba Governu atu asegura seguransa iha ita-nia fronteira terrestre atu evita movimentasaun ilegál, ne’ebé lori konsekuénsia negativu ba ita-nia rain. Reforsa seguransa sai nu’udar fatór determinante ba iha luta kontra COVID-19,” Deputada Elvina Sousa de Carvalho, levanta iha renovasaun deklarasaun estadu emerjénsia ba dala-XVII, iha uma fukun, tersa ne’e.

Bankada Partidu Libertasaun Populár (PLP), Deputadu Abel Pires da Silva, hateten estensaun estadu emerjénsia ba dala-XVII ne’e nesesáriu, nune’e kontinua fó biban ba Governu hasai medida prevensaun hasoru COVID-19 no variante Delta.

Bankada PLP enkoraja povu tomak atu apoia Governu liuhosi simu vasina tanba vasina nu’udar kilat únika luta kontra COVID-19 no variante Delta COVID-19.

Notísia Relevante: COVID-19: óbitu ida, pozitivu 187 no ativu 3.383

Bankada PLP hakarak bolu atensaun ba Governu hodi kontinua hametin kondisaun iha fronteira atu halo prevensaun ba populasaun sira-ne’ebé tama-sai illegal, tanba atividade ida-ne’e sai hanesan krime organizadu no ema balun halo fali hanesan negósiu hodi hetan lukru hosi atividade ilegál ida-ne’e.

Bankada PLP husu Governu kria kondisaun sufisiente ba ekipa liña frente sira, nune’e tau matan ba povu iha situasaun defísil ida-ne’e.

Xefe Bankada KHUNTO, Deputada Olinda Guterres, sente fuan moras tanba polísia iha fronteira barak maibé movimentu ilegál sei buras.

“Agora ema tama-sai ilegál iha área fronteira besik rihun ona, entaun polísia iha fronteira halo serbisu to’o iha-ne’ebé ona. Sentru integradu bele iha maibé fronteira mak hanesan ne’e nafatin, ne’e ha’u hanoin movimentu ilegál sei aumenta ba beibeik. Triste liu, ita rona dehan polísia sira mak hatudu dalan,” Xefe Bankada KHUNTO ne’e hateten.

Notísia Relevante: Komandu PNTL reforsa seguransa iha fronteira

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here