Kondisaun ponte Bekusi ne’ebé mota sobu durante inundasaun iha kapitál Dili. Imajen TATOLI/António Gonçalves

DILI, 24 agostu 2021 (TATOLI)—Komisaun Nasionál Aprovizionamentu (CNA, sigla portugés) hahú loke ona konkursu públiku atu halo rekuperasaun ba infrestutura iha fatin lima ne’ebé hetan estragu tanba dezastre naturál ne’ebé akontese iha loron 04 abríl.

“Ami finaliza ona dezeñu detalladu no Bill of Quantity (BoQ), hafoin Ajénsia Dezenvolvimentu Nasionál (ADN) verifika no Komisaun Administrasaun Fundu Infraestrutura (KAFI) aprova projetu iha fatin lima ne’ebé mak CNA halo ona konkursu Públiku, ne’ebé tempu besik asina ona kontratu ho empreza manan-na’in atu hahú ona projetu,” Diretór Jerál Obra Públika no Koodenadór ekipa task force ba rekuperasaun estragu dezastre naturál, Rui Hernani, hateten, ba Agência TATOLI, iha ninia knaar fatin, tersa ne’e.

Notísia relevante: CNA hahú prosesa aprovizionamentu rekupera estragu imediata área haat

Projetu iha área lima, kompostu hosi ponte no estrada bá Maloa, estrada Ailok-laran bá RTK, estrada iha Hospital Nacional Guido Valadares (HNGV) nia kotuk no estrada ligasaun Tibar ba Ermera inklui Ponte Bekusi, Becora.

Ponte Bekusi tama hotu ona iha konkursu, maibé foku ba halo  estudu, dezeñu detalladu no BoQ mak foin loke konkursu ba empreza sira atu sobu ponte tuan hodi halo foun.

“Projetu rekuperasaun iha fatin haat la’o ona no besik atu asina kontratu ho empreza sira,” nia akresenta.

Ekipa task force finaliza ona dezeñu detalladu ba estrada kotuk iha ponte CPLP bá Bebonuk, maibé sei aprezenta tan ba KAFI atu aprova hafoin CNA loke konkursu.

Tuir kálkulu, orsamentu ba rekuperasaun obra iha fatin lima inklui rua seluk ho kategoria serbisu imediata, ho kustu projetu millaun $5.

MOP ho instituisaun relevante sira identifika ona estragu infraestutura kauza dezastre naturál iha territóriu tomak iha lokál 101 ho kustu estimasaun millaun $245.

Hosi totál ne’e estragu ba verba estrada no ponte, fahe ba komponente rua hanesan infraestututura simples hamutuk 57 ho kustu inferior millaun $1 no projetu reabilitasaun estruturál komplexa hamutuk 44 ho kustu estimadu boot liu millaun $1.

“Ami finaliza dezeñu detalladu no BoQ ba projetu pakote 16 hosi komponente infraestutura simples, ne’ebé submete ona ba ADN atu  halo verfikasaun, hafoin lori ba KAFI aprova maka  CNA loke ba konkursu públiku,” nia hatutan.

Projetu reabilitasaun estruturál komplexa, daudaun ne’e ekipa task force hamutuk ho enjeñeiru UNTL hetan apoiu hosi JICA atu halo identifikasaun no estudu molok orsamenta.

“Ba identifikasaun munisípiu tomak, ita halo hotu ona no agora hein halo dezeñu detalladu, maibé ami tama faze dahuluk kategoria infraestrutura  simples, tanba infraestrutura komplexa ne’e tenta parametru  hodi halo estudu didi’ak hafoin halo dezeñu detalladu,” nia tenik.

Diretór Jerál ne’e rekoñese rekuperasaun ba projetu imediata ne’e tarde oituan tanba prosesu hotu tenke liuhosi prosedimentu atu halo rekuperasaun ba estragu sira.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here