Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida. Imajen Tatoli/Evaristo Soares Martins.

DILI, 23 agostu 2021 (TATOLI)—Diretór Ezekutivu Sentru Estudu ba Paz no Dezenvolvimentu (CEPAD-sigla portugés), João Boavida, hateten tempu ona promove transformasaun iha eleisaun prezidensiál no eleisaun parlamentár.

“Tempu to’o ona promove transformasaun no mudansa, la’ós de’it iha polítika maibé iha sosiedade tomak atu nune’e ita hahú ho buat foun. Buat foun ne’ebé mak atu mosu mak opurtunidade ba eleisaun prezidensiál. Ne’ebé eleisaun prezidensiál atu la’o oinsá, atu la’o tebes ka la la’o, ha’u hanoin liuhosi eleisaun mak ita sei deside katak buat-ne’ebé laloos ne’e, tenke dehan no rekuñese laloos, nune’e ita bele halo mudansa,” João Boavida informa ba jornalista sira, iha Bidau, Dili, segunda ne’e.

Atu promove transformasaun iha eleisaun prezidensiál no eleisaun parlamentár, nia dehan, xave iha povu tanba povu mak sei avalia durante tinan barak parpol sira-nia ukun hodi deside Xefe Estadu no parpol ida-ne’ebé halo transformasaun ba Timor-Leste.

Nia argumenta, durante besik tinan 20 ona Timor-Leste laiha mudansa signifikante ba dezenvolvimentu nasionál entaun fukun iha figura sira-ne’ebé lidera rai ida-ne’e.

Tuir nia, la’ós sai Xefe Estadu atu kastigu fali povu maibé tenke fó solusaun ba povu no nasaun nia problema.

“La’ós de’it ba Prezidente Repúblika maibé ezekutivu mós, tanba eleisaun prezidensiál mak atu mai uluk ona. Ha’u hanoin importante ita (povu) la’ós ba sira (boot sira) tenke komprende katak ema-ne’ebé ita hili nu’udar Prezidente Repúblika, ema ne’e tenke komprende didi’ak konstituisaun no hatene problema sira seluk,” nia dehan.

Ema-ne’ebé atu sai Prezidente Repúblika tenke defende sidadaun no partidu polítiku hotu iha lei nia okos, nune’e mós tenke komprende katak nu’udar xefe estadu tenke promove interese nasaun Timor-Leste nian iha rai-laran nomós rai-li’ur no tenke iha kapasidade intelektuál.

Kapasidade intelektuál ne’e intermu esperiénsia, tenke ho abilidade, nia tenke komprende didi’ak konstituisaun no tenke koñese didi’ak kontestu Timor-Leste nian.

Iha ne’e, la’ós kestaun jerasaun tuan atu entrega ba jerasaun foun maibé importante liu mak nasaun labele husik de’it iha inserteza hanesan ne’e, tenke akumula povu tomak no respeita ba konstituisaun.

Nia hateten, la’ós manán tiha eleisaun hodi fahe kadeira ba malu maibé iha vizaun atu lori nasaun ne’ebé ho dezenvolvimentu, tanba se ema ida laiha kapasidade maibé ho forsa polítiku kandidatu-an no povu hakarak fó votu ba nia, entaun povu mak sala.

Nia subliña, tempu ona povu haree ba programa iha eleisaun parlamentár nune’e nasaun ne’e la’o ba oin tanba tinan 20 ona Timor-Leste hanesan ne’e de’it.

“Satán iha pandemia COVID-19 ne’e ita presiza líder sira iha vizaun, kreatividade, matenek hodi hasai povu hosi kiak. Ema-ne’e tenke iha esperiénsia, kuñesimentu, abilidade intelektuál, profesionalizmu, integridade no promove transparénsia,” nia dehan.

Nia hatutan, la’ós kestaun forsa polítika mak manda tanba forsa polítika atu lejítima de’it ema-ida nia pozisaun, la’ós polítika matak mak atu determina ema-ida.

Jornalista : Evaristo Soares Martins

Editór       : Cancio Ximenes  

HAKEREK NO HATÁN

Please enter your comment!
Please enter your name here