Sekertáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Francisco Sony

DILI, 23 agostu 2021 (TATOLI)—Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’ husu ba Rádiu Komunidade sira atu adapta-an iha era dijitalizasaun, nune’e bele fornese informasaun di’ak ba públiku tuir evolusaun.

“Rádiu Komunidade sira tenke atualiza-an no adapta-an iha situsaun atuál, ne’ebé asuntu kona-ba mídia dijitál ou platafoma dijitál ne’e hanesan oportunidade ne’ebé maka Rádiu Komunidade sira tenke aprende no utiliza,” Sekretáriu Estadu hateten durante worshop nasionál ba Konsellu no Jestór Rádiu Komunidade kona-ba dijitalizasaun, ne’ebé realiza iha salaun JL Villa, Fatuhada, segunda ne’e.

Notísia relevante: Governu Lansa Rádiu Streaming Online ba Rádiu Komunidade 14

Tuir governate ne’e, workshop hanesan inisiativa di’ak tanba agora iha tempu dijitál, ema hotu tenke ajusta-an tanba durante ne’e meiu analog hotu funsiona ho di’ak no ema akompaña, maibé hafoin iha mudansa teknolojia, dalaruma ema muda ona prátika atu rona no lee.

“Durante ne’e, ita-bo’ot sira konsege utiliza prátika balun, hahú la’o ona liuhosi rádiu streaming, maibé koñesimentu ba plataforma dijitál tenke aumenta. Ha’u rona informasaun katak jornalista balun iha Rádiu Komunidade balun seidauk iha abilidade maka’as atu kontinua mantein uza rádiu streaming, entaun ida-ne’e presiza aumenta koñesimentu,” nia akresenta.

Nune’e, Akara konsidera, workshop ne’e hanesan oportunidade di’ak ba Rádiu Komunidade sira atu aproveita lia menon hosi oradór sira atu aprende buat foun.

“Ein termu polítika, Governu hakarak asegura nafatin atu apoia ita-bo’ot sira ho kondisaun no limitasaun orsamentu ne’ebé maka ita iha. Kompromisu ne’e maka Governu asegura no sei la husik ita-bo’ot sira la’o mesak. Maski ein prinsípiu ita-bo’ot sira kokorda katak Rádiu Komunidade  tenke sustenta hosi komunidade rasik, maibé Governu kontinua fó subsídiu ba ita-bo’ot sira-nia ezisténsia,” nia akresenta.

Rádiu komunidade ne’ebé eziste maka Tokodede Liquiçá, Rádiu Komunidade Comoro, Cova Taroman Suai, Atoni Lifau Oé-cusse, Vox Populi Lospalos, Mauloko Maubisse, Manukoko Ataúro, Ili-Wai Manatuto, 1912 Same, Lian Matebian Baucau, Kolelemai Sahe Bucoli, Rai-Husar Aileu, Povu Viqueque, Kafe Ermera, Lian Tatamailau Ainaro, no Rádiu Komunidade Maliana.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here