Xefe Kaza Sivíl Prezidénsia Repúblika, Francisco Maria de Vasconcelos. Imajen Tatoli/Egas Cristovão

DILI, 23 agostu 2021 (TATOLI)—Xefe Kasa Sivíl Prezidénsia Repúblika, Francisco Maria de Vasconcelos, informa Prezidente Repúblika, Francisco Guterres ‘Lú Olo’ rekopera ona hosi nia moras no funsionáriu Palásiu Prezidensiál na’in-39 pozitivu COVID-19 hafoin halo teste swab iha sesta (20/08). 

Notísia Relevante: Kestaun saúde, PR Lú Olo adia vizita bá Manufahi

“Prezidente Repúblika nia moras rekuperadu ona, taba ne’e mak ohin halo reuniaun Konsellu Estadu liuhusi Zoom no médiku sira mak rekomenda prátika normál iha fatin hotu-hotu atu evita kontaminasaun, nune’e la bele prejudika liután lori perigu ba Prezidente Repúblika,” Xefe Kaza Sivíl ne’e hateten ba jornalista sira, hafoin reuniaun Konsellu Estadu (KS) iha Palásiu Prezidensiál Nicolau Lobato, Bairru Pite, Dili, segunda ne’e.

Xefe Kasa Sivíl afirma Prezidente Repúblika la’ós kondisaun la di’ak maibé médiku mak rekomenda ba Prezidente Repúblika atu labele la’o, tanba ne’e mak Prezidente Repúblika adia nia vizita ba Munisípiu Manufahi ho Ainaro inklui la marka prezensa iha seremónia komemorasaun loron FALINTIL ba dala-46.

Entretantu, Xefe Kasa Sivíl ne’e haktuir funsionáriu Palásiu Prezidensiál na’in-39 pozitivu COVID-19, hafoin halo teste swab iha sesta (20/08) tanba halo viajen durante loron rua ba munisípiu Manufahi ho Ainaro iha segunda (16/08) ne’e.

“Teste swab ne’e halo iha sesta-feira, ami halo ba funsionáriu besik 100-resin hosi Kaza Sivíl ho Kaza Militár no iha na’in-39 mak hetan pozitivu COVID-19. Ohin, halo tan teset swab segunda faze ba ema 174 no lorokaik sei iha tan,” nia dehan.

Kona-ba rezultadu swab ba loron ohin nian, nia hateten, seidauk bele fó sai rezultadu maibé aban mak sei hatene rezultadu loloos.

“Ita hein katak negativu hotu. Maibé, se pozitivu sei hola medida ba Governu atu oinsá labele da’et ba ema seluk. Medida sira-ne’e halo tanba iha semana hirak liubá iha funsionariu na’in-tolu (3) ka haat (4) ba hala’o viajen servisu depois mai halo teste, iha ema na’in-tolu (3) mak hetan pozitivu COVID-19,” nia esplika.

Nia hateten, bainhira aranka ba munisípiu rua seluk tan tenke halo teste swab tanba bainhira halo viajen servisu ba Manufahi ho Ainaro, iha ne’ebá médiku-32 infetadu COVID-19, entaun deside tenke halo teste swab maske funsionáriu sira simu hotu vasina doze daruak hosi AstraZeneca no Sinovac.

“Ida-ne’e hanesan medida ida atu prevene, labele prejudika sira-nia família ho mós sosiedade ne’ebé hela besik sira,” nia hateten.

Notísia Relevante: COVID-19: óbitu rua, pozitivu 235 no ativu 3.264

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here