Komandante Polísia Nasionál Timor-Leste munisípiu Baucau, Superintendente Xefe Armando Monteiro. Imajen TATOLI/Natalino Belo

BAUCAU, 23 agostu 2021 (TATOLI)—Komandante Polísia Nasionál Timor-Leste (PNTL) Baucau, Superintendente Xefe Armando Monteiro, hateten, Komandu halo ligasaun ho autoridade lokál liuhosi programa Polisiamentu Komunitáriu ne’ebé diretamente envolve autoridade lokál inklui komunidade hodi kria ambiente seguru no hakmatek.

“Hau-nia programa atu lori PNTL besik liu ba komunidade liuhosi programa Polisiamentu Komunitáriu, ne’ebé serbisu ne’e atinje ona 65%, tanba Baucau estabelese ona iha suku 34 hosi totál suku 59, ne’ebé tuir planu sei konklui iha tinan 2021,” Superintendente Xefe Armando informa iha ninia knaar fatin, Villa nova, segunda ne’e.

Komandante PNTL Baucau konsidera, komunidade no autoridade lokál ninia envolvimentu bele asegura estabilidade seguransa iha rejiaun.

“Seguransa la’ós ami halo servisu mesak, maibé seguransa ne’e PNTL mai hosi povu, dedika ka sakrifísiu ba povu, ita la ses no la dook, envolve ita-nia povu hodi nune’e garante estabilidade iha área rurál sira tanba PNTL nia rekursu limitadu,” nia akresenta.

Aleinde ne’e, iha loron 04 setembru sei realiza konsolidasaun deklarasaun kompromisu entre juventude liuhosi organizasaun arte marsiál no rituál, ne’ebé sei hahú hosi postu Baguia.

Objetivu hosi atividade ne’e, atu deklara hakarak hakribi violénsia no projeta futuru hodi partisipa iha estabilidade seguransa no desenvolvimentu iha Baucau.

Deklarasaun ne’e sei envolve lia-na’in hosi postu Baguia, ne’ebé sei halo tradisaun kulturál no parte igreja sei enserra seremónia ho misa agradesimentu.

“Juventude tenke garante seguransa tanba futuru Baucau hanesan zona indústria, investimentu no dezenvolvimentu, ne’ebé sei fó benefísiu ba povu iha Baucau,” nia hatutan.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here