INDIMO realiza formasaun via zoom iha salaun Sentru Formasaun João Paullo II, Comoro, segunda (23/08). Imajen TATOLI/Francisco Sony

DILI, 23 agostu 2021 (TATOLI)–Institutu Nasionál Dezenvolvimentu de Mão-de-Obra (INDMO) realiza formasaun via virtuál ba akreditór sira durante loron lima, hahú loron 23 to’o 27 agostu.

Diretora INDMO, Isabel Fernandes de Lima, hateten, programa ne’e nu’udar kontinuasaun hosi akordu ne’ebé Asia Pacific Accreditation and Certification Commission (APACC) no institutu rasik selebra iha loron 15 novembru 2019, iha ámbitu preparasaun instituisaun Technical Vocational Education and Training (TVET) Timor-Leste hodi hetan akreditasaun.

Diretora INDIMO, Isabel Fernandes de Lima. Imajen TATOLI/Francisco Sony

“Akreditór sira sei aprende liu prosedimentu aplikasaun no hafoin ramata, sei realiza teste tanba sira la’ós sai de’it akreditór nasionál, maibé hanesan membru Asia Pacific Accreditation and Certification Commission, tanba bainhira sai akreditór internasionál la halo akreditasaun de’it iha rai-laran maibé hamutuk ho membru partisipa iha akreditasaun seluk ne’ebé hamahan-an iha komisaun ne’e,” Diretora INDMO, hateten, hafoin abertura ba formasaun iha salaun João Paulo II, Comoro, segunda ne’e.

Objetivu hosi programa ne’e atu fó koñesimentu kona-ba kritéria, indikadór no sub-indikadór APACC, transmite papél, responsabilidade no atribuisaun sira ba akreditór komisaun, informa prosesu ne’ebé envolve no dokumentu ne’ebé presiza molok, durante no hafoin avaliasaun institusionál.

Partisipante iha programa ne’e hamutuk 20, ne’ebé mai hosi ofisiál seniór, dosente, formadór INDMO, Ministériu Edukasaun, Juventude no Desportu (MEJD), Sentru Formasaun Profisionál, eskola tékniku vokasionál, Ensinu Superiór no Ajénsia Nasionál ba Avaliasaun no Akreditasaun Akadémika (ANAAA).

Aleinde ne’e, atividade ne’e iha vantajen atu prepara armonizasaun no kualifikasaun hotu, ein termu prepara produtu formasaun iha futuru, nune’e depende ba akreditór sira katak sentru formasaun no instituisaun ne’ebé halo formasaun profisionál bele responde ona rekerimentu sira ne’ebé INDMO estabelese.

INDMO nu’udar ajénsia Estadu ne’ebé harii tuir Dekretu-Lei númeru 8/2008, ho objetivu atu dezenvolve polítika formasaun profisionál, define padraun kompeténsia no estabelese sistema sertifikasaun nasionál.

Alende ezerse funsaun sira hosi kriasaun lei, implementa funsaun avaliasaun, permite lisensamentu operasionál no akredisaun ba sentru formasaun profisionál ho nível formasaun, tuir Dekretu-Lei númeru 36/2011 kona-ba sistema nasionál kualifikasaun.

Iha esforsu INDMO habelar ona nia asisténsia no haforsa rekursu umanu iha rejiaun, tanba ne’e, APACC nu’udar ajénsia rejionál ba akreditasaun no sertifikasaun, kolabora ho institutu ne’e hodi organiza programa formasaun nune’e bele hasa’e partisipante sira-nia entendimentu akreditasaun, nu’udar instrumentu hasa’e kualidade intituisaun TVET no harii sira-nia kapasidade hodi hahú prosesu atuál akreditasaun uza kritéria APACC iha Timor-Leste.

ANAAA sai sasin iha formasaun

Diretór Ezekutivu ANAAA, Edmundo da Silva Viegas, hateten, prezensa ajénsia ne’e iha atividade  hodi sai sasin ba formasaun.

“Iha urjénsia ida atu akredita no sertifika avaliadór sira liuhosi formasaun sira ne’e, tanba sira mak iha knaar ida aban bainrua tau-matan ba sentru formasaun iha nível 1-4, ita-nia formasaun duni traballadór sira ne’ebé maka prienxe kompeténsia iha nível idaidak,” Edmundo esplika.

Partisipante formasaun ne’e sei hetan sertifikadu akreditór no sei hola parte iha ekipa akreditór APACC.

APACC estabelese liuhosi deklarasaun Seoul iha tinan 2004, ne’ebé projeta atu providénsia servisu akreditasaun no sertifikasaun internasionál hodi hasoru sistema jestaun instituisaun ensinu tékniku no formasaun profisionál ne’ebé kualidade, ho nune’e, bele prodús forma traballu kompetente no kualidade.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here