Ekipa CAC aprezenta arguidu no arguida hamutuk na’in-haat hanesan mós emprezáriu, ba Tribunál Distritál Dili (TDD) hodi submete ba primeiru interrógatóriu, sesta (20/08). Imajen Tatoli/Francisco Sony.

DILI, 23 agostu 2021 (TATOLI)—Tribunál Distritál Dili (TDD), liuhosi despaixu primeiru interrogatóriu, aplika ona medida koasaun aprezentasaun periódika no proibisaun auzénsia  ba arguidu na’in-haat nu’udár emprezáriu.

Arguidu no arguida na’in-tolu ho insiál RH, NS no GMBC, mak hetan medida koasaun aprezentasaun periódika, no sei aprenzenta-an kada fulan dala ida, iha Komisaun Anti Korrupsaun (CAC sígla portugés).

Notísia relevante:CAC lori ona emprezáriu na’in-haat ba Tribunál

Arguidu AK mak Tribunál aplika proibisaun auzénsia hodi halo apreensaun passaporte no labele sai hosi  territóriu nasionál, tanba nu’udár sidadaun estranjeiru.

Ho medida ne’ebé Tribunál aplika, bele asegura arguido-sira hodi fasilita  Ministériu Públiku  (MP) ho CAC atu halo investigasaun kle’an ba prova-sira, nune’e aprezenta ba Tribunál iha julgamentu normál tuir-mai.

Advogadu privadu, Pedro Aparicio, ne’ebé fó asisténsia legál ba arguidu-sira, hateten parte defeza sei haree ka análiza didi’ak desizaun ne’e tuir prazu ne’ebé  iha possibilidade  bele halo rekursu.

Emprezáriu na’in-haat ne’e kumpre ona detensaun iha sela CAC durante oras 72.

Iha 17 agostu 21, CAC ezekuta mandadu buska domisiliáriu apreensaun no mandadu detensaun ho NUC 0024/21.PGGCC hosi (TDD), ba arguida no arguidu na’in-haat ne’ebé  suspeita ho krime fraúde fiskál iha artigu 314 no brankamentu kapitál previstu iha artigu 313, iha kódigu penál, deskonfia  hala’o atividade ekonómika liuhosi sira-nia  kompañia importa karreta, motór, ekipamentu médiku no ai-moruk mai TL, inklui suplay  iha rai laran maibé desde 2012 to’o agora la selu taxa ba Estadu ho  valór prejuizu rihun $200-resin.

Nune’e, liuhosi mandadu buska ekipa investigadór CAC hala’o buska ba iha rezidénsia suspeitu sira-nian iha Bairru Pité inklui iha edifísiu kompañia iha Fatuhada no arguida ida ka’er iha arredór eskola Institutu Ciênsia Saúde (ICS) iha Comoro.

Durante iha terrenu, ekipa CAC rekolla ona dokumentu  lubuk ida hanesan atividade lisensa kompañia nian, no dokumentu ne’ebé iha relasaun ho projetu ne’ebé kompañia durante ne’e sai vensedór barak iha Ministéiru Saúde no RAEOA, ligadu ho fornesimentu ekipamentu médiku ho sira seluk.

Maski nune’e, kompañia ne’e ninia sertidaun dívida invalidu no la selu taxa ba Estadu, maibé liuhosi prosesu aprovisionamenu kontinua manán projetu iha Governu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here