Kondisaun mobiliáriu DNTT munisipiu Bobonaro, segunda (23/08). Imajen Tatoli/Sérgio da Cruz.

BOBONARO, 23 agostu 2021 (TATOLI)—Diresaun Nasionál Transporte Terreste (DNTT), munisipál Bobonaro, presija fasilidade mobiliáriu hanesan meza, kadeira no seluk tán hodi utiliza ba serbisu atendimentu komunidade, tanba buat hotu ne’ebé oras-ne’e utiliza tuan hotu ona.

“Mobiliáriu iha-ne’e, la’ós de’it menus, maibé ne’e antigu hotu ona. Desde inisiu estabelesimentu edifísiu ida-ne’e seidauk iha mundansa ba meza no kadeira,” Diretór DNTT munisipál Bobonaro, Paulo Henriques Baptista, hateten ba jornalista-sira, iha kna’ar fatin Soso Maliana, segunda ne’e.

Notísia relevante:DNTT Bobonaro laiha orsamentu manutensaun ba sinál tránzitu

Problema ne’e difikulta funsionáriu-sira bainhira hala’o atendimentu ba Komunidade tanba kondisaun  meza ho  kadeira balun komesa dodok no tohar.

Alende ne’e, difikulta mós atu responde ba estudante-sira ne’ebé tinan-tinan sempre hala’o estájiu hodi kompleta sira-nia estudu.

Situasaun ne’e mós halo funsionáriu-sira serbisu la seguru tanba dalaruma dokumentu orijinál balun tau de’it iha fatin la garantidu no armáriu la sufisiente atu akumula dokumentu-sira ne’e.

Parte dirijente orienta funsionáriu-sira hodi halo de’it arkivu ho sitema eletróniku, maibé dokumentu fíziku so’e de’it iha rai.

Problema hirak-ne’e elabora ona iha planu anuál kada tinan, maibé to’o ohin lorn seidauk hetan resposta pozitivu ruma hosi Governu.

Parte DNTT Bobonaro husu Governu atu tau atensaun ba problema kona-bá transporte iha planu prioridade, tanba desde 2017 mai to’o agora DNTT seidauk hetan substituisaun transporte.

Alende ne’e, tau mós orsamentu operasionál, nune’e funsionáriu-sira bele halo atividade iha terrenu no mós halo manutensaun ba sinál tránzitu ne’ebe hetan estragu.

Hahú hosi janeiru to’o jullu, DNTT Bobonaro rekolla $35.565,50 ba kofre Estadu la inklui fulan abríl tanba munisipiu Bobonaro implementa hela serka sanitária.

Reseita ne’e kontribui mai hosi atendimentu inspesaun veíkulu, lisensa trajetu, lisensa karta kondusaun, rejistu veíkulu no seluk tan.

Totál funsionáriu iha DNTT Bobonaro hamutuk na’in 11, hosi númeru ne’e na’in-neen permanente no na’in-lima kontratadu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here