Diretór Ezekutivu CEPAD, João Boavida. Imajen Tatoli/Egas Cristóvão.

DILI, 23 agostu 2021 (TATOLI)—Sentru Estudu ba Paz no Dezenvolvimentu (CEPAD-sigla portugés), preokupa ho partidu polítiku sira halo konsolidasaun iha kazu COVID-19 COVID-19 tanba atividade konsolidasaun ne’e halibur ema barak liu.

Diretór CEPAD, João Boavida, hateten efeitu hosi polítika ne’ebé Estadu hamosu deklarasaun estadu emerjénsia atu besik tinan-rua ona no oras ne’e tama tán variante foun Delta COVID-19 maibé la hatudu efeitu pozitivu ba povu.

Nia observa, Governu deside estadu emerjénsia la’o besik tinan-rua ona liuhosi medida ezekusaun oioin hodi satán COVID-19 maibé seidauk hatudu buat di’ak ruma, tanba ema mate ho COVID-19 hamutuk 48 ona.

“Aat liután ita-nia polítika na’in sira tún hela ba baze hodi halo konsolidasaun ba eleisaun prezidensiál no parlamentár. Ne’ebé, ita preokupa tanba iha pontu ida sira hamosu estadu emerjénsia no iha pontu seluk, sira halo konsolidasaun hodi halibur ema barak. Agora ita hotu moris ho konfuzaun boot ida,” João Boavida informa ba jornalista sira, iha Bidau, segunda ne’e.

Diretór CEPAD ne’e preokupa ho Timor-Leste nia pozisaun atu reziste hasoru COVID-19 no variante Delta tanba agora Timor-Leste seidauk iha sistema saúde ne’ebé di’ak hodi asegura sidadaun sira.

Tanba, tuir nia, Governu atu reziste de’it hasoru moras baibain sira mós susar tebes, satán atu reziste hasoru variante Delta COVID-19.

“Se variante Delta COVID-19 mak mosu tebes ona, ha’u hanoin sistema saúde seidauk di’ak entaun sei sai aat liután, se la fó ba ita opurtunidade atu reziste Delta,” nia dehan.

Tuir nia haree katak fatin izolamentu tolu hanesan Vera Cruz, Lahane no Tasi Tolu ne’e la’ós laiha kapasidade atu simu pasiente Delta nian maibé Governu mak la kria duni fasilidade atu simu pasiente COVID-19.

“Agora ita iha situasaun ida preokupadu. Ha’u lamenta tanba ita aplika estadu emerjénsia besik tinan-rua ona maibé ita-nia Estadu la kria fasilidade natoon atu simu tán pasiente sira iha tempu ikus mai,” nia dehan.

Nia haktuir, ho polítika tinan-rua nian seidauk to’o iha pontu ida-ne’ebé timor-oan tane ho seriedade COVID-19 ne’e perigozu duni tanba ema barak lafiar.

“Pergunta boot mak ne’e, iha Timor laran ne’e Delta ne’e afeta ona ema na’in hira, Governu tenke fó imformasaun klaru ba ida-ne’e. Ho medida preventina tinan-rua nian ne’e Governu iha polítika saida atu hatán ba situasaun ne’e,” nia fó hanoin ba Governu.

Tuir dadus hosi Sala Situasaun, Sentru Integradu Jestaun Krize (SIJK), domingu ne’e rejista kazu óbitu rua, pozitivu 235, rekoperadu 57 no kazu ativu 3.264. Totál óbitu ne’ebé relata domingu ne’e, na’in-ida ho idade 76, timor-oan, hela iha Dili, no iha 21 agostu 2021, diagnóstikadu ho Sindroma Insufisiénsia Respiratória Aguda (SIRA) tanba COVID-19.

Kazu foun domingu ne’e iha 235 mai hosi Dili 183, Covalima 31, Manufahi 13 no munisípiu seluk  na’in-ualu ne’ebé kompostu hosi mane 111 no feto 124.

Hosi totál kazu detetadu foun ohin, ho idade 20-59 (23,8) entre tinan 12-59 na’in 170 (72,3%), idade 60 mai karaik na’in-neen. Hosi kazu detetadu foun ohin 89 kazu ka 33,3% sintomatiku (hatudu sintomas).

Kumulativu kazu konfirmadu sura hosi 21 marsu 2020 to’o 22 agostu 2021 hamutuk 14.216. Hosi horisehik mai ohin, teste ne’ebé Laboratóriu Nasionál Saúde halo hamutuk 431 PCR, ho detallu hanesan tuir-mai, Vijilánsia sentinela na’in 22, rastreiu ba kontaktu ka Contact tracing 210, Rastreiu Aleatóriu ka Random Screening nain 25, viájen sai-hosi serka sanitária hosi Dili 150, Viájen internasionál 16, Follow up iha kuarentena na’in-ualu.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here