Xefe Suku Camanasa, Samuel Barros. Imajen Tatoli/Celestina Teles

COVALIMA, 23 agostu 2021 (TATOLI)-Xefe Suku Camanasa, Samuel Barros, fó ona  orientasaun ba xefe aldeia iha Suku Camanasa, Postu Administrativu Suai Villa, Munisípiu Covalima, atu identifika família vulneravel sira.

“Ha’u nu’udar Xefe Suku fó ona orientasaun ba ha’u nia xefe  aldeia sira atu  identifika fali família vulneravel sira ne’ebé menus ona ai-han iha Suku Camanasa,”  Xefe Suku Camanasa,  Samuel Barros,  informa ba Agência Tatoli iha Sede Suku Camanasa, segunda ne’e.

Iha fulan juñu, tinan ne’e,  MSSI fó apoiu ona foos saka 216 ba família vulneravel iha Suku Camanasa,  maibé balun la konsege identifika tanba ne’e kontinua identifika  família vulneravel hodi atu bele hetan apoiu hosi MSSI.

“Ami nu’udar lideransa komunitária, ami haree direita kondisaun hosi komunidade sira enfrenta menus ai-han tanba atividade negósiu sira ne’e ita haree la’o ladún di’ak, tanba implementa serka sanitária no estuda emerjénsia halo komunidade nia atividade negósiu paradu hodi fó impaktu ba komunidade sira,”  Samuel Barros hateten.

Populasaun iha Suku Camanasa hamutuk na’in-4.908, kompostu hosi mane  na’in-2.503 no feto 2.403.

Diretór MSSI  Covalima, Agapito Asis hateten, stoke foos  iha armazén Covalima,  sufisiente hodi responde ba família vulneravel menus ai-han  iha Covalima.

“MSSI simu proposta hosi autoridade lokál ne’e ita responde ona, iha balun mak seidauk .Tanba semana ne’e foos saka 1000 foin mai hosi Díli hodi bele fó apoiu ba família vulneravel sira ne’ebé presiza ai-han,” Agapito Asis hateten.

Jornalista   : Celestina Teles

Editór        : Francisco Simões

HAKEREK NO HATÁN

Please enter your comment!
Please enter your name here