Federasaun Boxe Amadora Timor-Leste (FBATL) realiza konferénsia imprensa relasiona ho komemorasaun loron internasionál Boxe ne'ebé sei selebra iha loron 27 agostu 2021, iha salaun Benfica, segunda (23/08). Imajen Tatoli/Francisco Sony

DILI, 23 agostu 2021 (TATOLI)-Diretór Ezekutivu Federasaun Boxe Amadora Timor-Leste (FBATL), Janio Tilman, hateten hetan ona resposta pozitivu ho organizasaun internasionál rua iha mundu hanesan World Boxing Council (WBC), Association Internationale de Boxe Amateur (AIBA) ne’ebé toma konta ba Boxe hotu iha mundu.

Nia dehan, antes ne’e hasoru krize boot iha FBATL bainhira kongresu hala’o iha 2018 no laiha kontaktu direita ho organizasaun rua ne’e hodi fó impaktu ba atividade Boxe la hala’o atividade.

“Ita hetan ona rezultadu pozitivu hosi WBC no AIBA tanba iha tinan hira ba kotuk ita hasoru problema, krize atividade hotu paradu, entaun iha setembru 2020, ita tenta kontaktu ho organizasaun rua-ne’e no tama mai 2021 ita konsege hetan karta ofisial atu selebra loron internasionál Boxe ne’ebé sei hala’o iha 27 agostu hodi hala’o ho atividade sira Boxe nian,” Janio Tilman hateten liuhosi konferénsia imprensa ne’ebé hala’o iha edifísiu FBATL, Colmera, Dili, segunda loraik ne’e.

Iha Timor-Leste planu ona atu organiza jogu ruma iha area Boxe nian atu selebra loron importante ne’e ho simples atleta Boxe sira sei hasoru malu sa’e-riin durante ronde tolu. Iha ne’ebé fatin sei hala’o iha resintu Sekretaria Estadu Juventude no Desportu (SEJD).

“Ita hanoin ona, maibé jogu sira atu selebra loron ne’e sei iha faze diskusaun nia laran, tanba ita hotu hatene pandemia Covid-19. Entaun ami nia ekipa sei loke fali diskusaun ho SEJD hodi hare posibilidade atu realiza atividade sira,” nia dehan.

Preparasaun FBATL hahú hosi jullu to’o agora no servisu hamutuk ho SEJD hodi aprezenta estatutu, rejimentu interna federasaun nian ba SEJD atu konsidera mós atividade Boxe iha nasaun ne’e.

Oportunidade realiza atividade Boxe atu introdús mós Boxista sira ne’ebé naran komesa atu lakon ona iha Timor – Leste. Tuir nia Boxista hirak ne’e nia kontribuisaun mak hamosu FBATL ho nune’e tenke dignifika nafatin ba oin.

Daudaun ne’e asosiasaun ne’ebé hamahan an iha FBATL hamutuk 11 iha territóriu nasionál.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here