iklan

EKONOMIA, COVID-19, MUNISÍPIU, OÉ-CUSSE (RAEOA), SAÚDE

Autoridade RAEOA oferese foos saka 1.435 ba Naimeco no Saben

Autoridade RAEOA oferese foos saka 1.435 ba Naimeco no Saben

Foos ne’ebé Autoridade RAEOA oferese bas uku Naimeco sub rejiaun Panta Makasar no aldeia Saben suku Bobometo sub rejiaun Oésilo, domingu (22/08/21). Imajen média ZEESM.

OÉ-CUSSE, 22 agostu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretáriu Rejionál Asuntu Administrasaun, oferese foos saka 1.435 ba suku Naimeco sub-rejiaun Pante Makasar, ho aldeia Saben, suku Bobometo sub-rejiaun Oésilo.

Distribuisaun foos ne’e atu tulun komunidade ne’ebé falta ai-han tanba durante periúdu Estadu emerjénsia no serka sanitária labele hala’o atividade hanesan baibain hanesan halo toos, ba merkadu, no seluk tan.

Notísia relevante:Serka sanitária iha RAEOA, Dili no Ermera to’o 30 agostu

Komunidade aldeia Saben hetan foos saka 183 no suku Naimeco kompostu hosi aldeia haat hetan foos saka 861, inklui foos adisionál ba estudante hamutuk saka 34.

“Governu aplika serka sanitária ba fatin rua ne’e to’o 30 agostu, nune’e autoridade tenki prepara kondisaun ba sira, liuhosi oferese nesesidade bázika,” Sekretáriu Rejionál Asuntu Administrasaun, Martinho Abani Elo, informa ba jornalista Agência Tatoli, via telefónika, domingu ne’e.

Xefe suku Naimeco, Marcos Liu Abi, sujere ba autoridade RAEOA atu kontinua prepara alimentár ba komunidade tanba  foos saka ida ladun responde nesesidade komunidade iha periúdu serka sanitária.

Iha 04 agostu, Governu liuhosi reuniaun Konsellu Ministru (KM), deside impoin serka sanitária iha suku Naimeco sub-rejiaun Pante Makasar no aldeia Saben suku Bobometo sub-rejiaun Oésilo, hahú hosi 05 to’o 18 agostu 2021.

Iha 18 agostu, Governu kontinua estende projetu rezolusaun, hodi mantein impozisaun serka sanitária iha rejiaun tolu, inklui RAEOA to’o fulan ne’e nia rohan.

Jornalista: Abílio Elo Nini

Editór: Cipriano Colo

iklan
iklan

Leave a Reply

iklan
error: Content is protected !!