Movimentu Juventude Millenial apoiu no husu Espoza PM, Isabel da Costa Ferreira kandidata an ba Prezidente Republika.imajen/Florencio Miranda Ximenes.

DILI, 21 augustu 2021 (TATOLI)—Movimentu Juventude Millenial (MJM) manifesta ninian apoiu inkondisionál no sei aproxima ezposa Primeiru-Ministru Taur Matan Ruak, Isabel da Costa Ferreira atu kandidata-an independetemente ba Prezidente Repúblika períodu 2022-2027.

Prezidente Movimentu Juventude Milenial, Juvencio Amaral, hateten daudaun ne’e MJM hahú halo ona aprosimasaun ho ho Isabel da Costa Ferreira atu kandidata-an ba Prezidente Repúblika hodi kompete iha eleisaun perzidensiál 2022.

“Ami iha ona prosesu aproximasaun no kuaze 99,1% mak Isabel da Costa Ferreira hakarak kandidata an ba Prezidente Repúblika. Dauudaun ne’e iha Portugál no fila mai Timór sei konfirma hakarak ka lakohi,” Prezidente MJM ne’e hateten liuhosi konferénsia imprensa iha restaurante Benifica, Dili, sábadu ne’e.

Maske sediauk konfirma 100%, maibé nu’udar juventude Timor-oan husu no apoiu nafatin atu nia bele kandidata an hodi kompleta no kompete iha festa demokrasia eleisaun Prezidente Repúblika iha 2022.

Hatan ba proponente, Prezidente MJM ne’e dehan hahú faze inisiu atu apoiu kandidatura ne’e, hafoin Isabel da Costa Fereira konfirma hakarak avansa duni. MJM kontinua servisu maka’as hodi buka proponente apoiu ba kandidatura ne’e.

“Ami fiar katak Joven hotu ne’ebé akumula iha movimentu ne’e kuaze ema barak ne’ebé bele ona prenxe rekezitu hodi lori Isabel da Costa Ferreira ba Prezidente Repúblika,” nia garante.

Portavós Movimentu Juventude Millennial, Aniceto Alberto Carlos, hateten MJM apoiu Isabel da Costa Ferreira ninia kandidatura ba Prezidente Repúblika tanba konsiente katak, Timor-Leste daudaun ne’e nakonu ho kultura vingativa hodi hamosu problema oioin iha setór sosiál hotu-hotu.

“Ami hakarak husu Isabel da Costa Ferreira (Espoza Primeiru-Ministru Taur Matan Ruak) atu kandidata Independente ba Prezidenete Repúblika, no ami mós afirma ho prontidaun hodi manifesta ami-nia apoiu inkondisionalmente ba Kandidatura ne’e ba iha Eleisaun Prezidente Repúblika,” Portavós ne’e afirma.

Ho razaun ne’e, MJM hanoin katak ema ne’ebé tenke sai Prezidente Repúblika, tenke mai hosi Kandidatura Independente no tenke feto.

Nune’e, Isabel da Costa Ferreira hanesan kandidatura ne’ ebé Independente no feto ne’ebé bele asegura Unidade Nasionál no bele sai guarda Konstituisaun hodi lori hikas Timor-Leste ba timór-oan tomak.

“Ami hakarak atu la’o hamutuk ho Isabel da Costa Ferreira, tan nia hanesan lider joven ida no bele hahú atu loke odamatan mai ami juventude sira hodi luta ba mudansa tanba nia hanesan ema ativista ida-ne’ebé dezde sempre luta ba kestaun Direitu Umanu iha Timor-Leste,” nia afirma.

MJM mós fiar nia kandidatura ne’e nakonu ho personalidade no karáter, ne’ebé mak refleta ba iha valór sira hanesan karidade, solidariedade, onestidade, tolerante, amante ba pás no entre seluk.

“Ami hanoin mós pertinente tebes atu iha istória Timor-Leste nian, liu-liu iha momentu krusiál sira hanesan daudaun ne’e, atu sai Prezidente Repúblika ba RDTL tenke Feto. Feto ida-ne’ebé iha abilidade, kompeténsia, integridade no koñesimentu no Timor-Leste presiza prezidente ida-ne’ebé iha sentimentu hanesan inan ida,” nia dehan.

MJM hanoin tempu to’o ona eleje feto ba Prezidente Repúblika, atubele promove igualdade jéneru iha Timor-Leste no laiha balansu bainhira iha eleisaun hotu-hotu númeru barak sei okupa hosi mane.

Entretantu iha Konstituisaun RDTL, Títulu II (Prezidente Reapúblika), Kapítulu I (Estatutu, Eleisaun no Nomeasaun), iha artigu 74 (Definisaun) númeru 1 hateten, Prezidente Repúblika maka Xefe-Estadu, símbolu no garantia independénsia nasionál no unidade Estadu nian, no instituisaun demokrátika sira-nia funsionamentu regular, no númeru 2 hateten, Prezidente Repúblika maka Komandante A’as liu Forsa Armada nian.

Iha artigu 75 (Elejibilidade) númeru 1 ne’e hateten, bele tuir kandidatura ba Prezidente Repúblika sidadaun timoroan sira-ne’ebé, iha ilas hotu tuirmai ne’e:

a.) Sidadaun nanis;

b.) Iha tinan mínimu 35;

c.) Ho kapasidade di’ak;

d.) Ne’ebé hetan proposta husi sidadaun hili-na’in mínimu nain rihun lima.

Iha númeru 2 haktuir, Prezidente Repúblika kaer mandatu to’o tinan lima (5) nia laran no ninia knaar ramata bainhira Prezidente foun simu pose, no númeru 3 hateten Prezidente Repúblika nia mandatu bele hetan renovasaun dala-ida de’it.

Artigu 76 (Eleisaun) númeru 1 hateten, atu sai Prezidente Repúblika, sei hili tuir sufrájiu universál, livre, diretu, sekretu no ida-idak, no númeru 2 haklaken Eleisaun Prezidente Repúblika nian banati tuir sistema manán ho votu barakliu hosi votu hotu-hotu ne’ebé válidu, la sura votu ne’ebé la válidu.

Iha númeru 3 hateten, bainhira kandidatu sira hetan votu hanesan, sei hala’o fali eleisaun dala ida tan, liutiha loron tolunulu (30) hosi loron votasaun ida foin liubá kotuk, no númeru 4 haktuir iha eleisaun daruak, kandidatu na’in-rua ne’ebé hetan liu votu no la hasai sira-nia kandidatura mak bele tuir.

Jornalista : Florencio Miranda Ximenes

Editór       : Cancio Ximenes

HAKEREK NO HATÁN

Please enter your comment!
Please enter your name here