Sekretáriu Estadu Asuntu Kombatente no Libertasaun Nasionál, Gil da Costa Monteiro 'Oan Soru'. Imajen TATOLI/Natalino Belo

BAUCAU, 20 agostu 2021 (TATOLI)—Sekretáriu Estadu Asuntu Kombatente no Libertasaun Nasionál (SEAKLN) halo sosializasaun ba veteranu sira iha postu admistrativu Baucau villa, kona-ba asuntu tolu importante hanesan levantamentu dadus uma-lisan, Jardim dos Herois no fundu investimentu veteranu.

Sekretáriu Estadu Asuntu Kombatente no Libertasaun Nasionál Gil da Costa Monteiro ‘Oan Soru’, hateten, atividade ne’e loloos finaliza ona, maibé tanba hasoru situasaun pandemia, maka foin finaliza iha postu 49, enkuantu seluk seidauk, Baucau hahú hosi Baguia no sei termina iha Vemasse.

“Se lae futuru mai ita siik de’it, ita ko’alia kona-ba 250.000 (mate) maibé ita laiha lista serteza, feto no mane hira,” Sekretáriu Estadu dehan, iha Sentru Konvensaun Baucau ( CCB, sigla portugés) sesta ne’e.

Levantamentu dadus tuir uma-lisan ba ema sira ne’ebé mate hahú hosi tinan 1975 to’o 1999, tanba presiza dadus própriu nune’e bele hatene númeru klaru.

Aleinde ne’e, governante ne’e dehan, kona-ba dekretu-lei númeru 30 kona-ba simiteiru espesiál ka Jardim hos Herois bele iha postu administrativu hotu, maibé seidauk iha esplikasaun di’ak ba veteranu sira, nune’e mosu hanoin bainhira mate ba hakoi iha Metinaro mak sai eroi.

“Tanba ne’e, ami sosializa atu Kombatente sira bele hatene no bele fó hanoin karik iha ona aseitasaun katak bainhira kombatente ida mate, tenke hakoi duni iha nia munisípiu ne’ebé moris ba,” Gil akresenta.

Konsellu Veteranu iha munisípiu mak sei koordena ho autoridade lokál sira atu define fatin ne’ebé própriu tuir dekretu-lei.

Seluk kona-ba fundu investimentu veteranu ka ko’a osan $30 hosi subsísiu kada veteranu iha kada fulan, ne’ebé hahú ona iha janeiru 2020 to’o ohin loron sei akumula hanesan investimentu.

Tuir dadus, daudaun ne’e halibur ona osan hamutuk millaun $15 resin, ne’ebé ho konseitu polítika klaru no téknika implementasaun sei prodús.

Iha fatin hanesan Sekretáriu Jerál Konsellu Munisipál Kombatente Libertasaun Nasionál Baucau, Manuel ‘Alari’ da Costa Soares, konsidera aktividade sosializasaun importante ba veteranu sira atu akompaña.

“Ami husu sira mai lori ho oan mane ruma atu akompanã no rona loloos lala’ok kona-ba fundu veteranu nian,” Alari akresenta.

Atividade sosializasaun iha munisípiu Baucau hala’o durante loron neen, hahú hosi postu administrativu Baguia, Laga, Quelicai, Venilale, Baucau Villa no sei termina aban iha Vemasse.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here