Prezidente Parlamentu Nasional, Aniceto Longuinhos Guterres Lopes, Imajen Tatoli/Antonio Gonçalves.

DILI, 20 agostu 2021 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, husu sidadaun hotu-hotu atu kontinua kumpre regra prevensaun iha vijénsia propagasaun surtu COVID-19.

Nia hateten, ohin-loron saúde públika sai preokupasaun boot tebes ba ema hotu no ba Estadu Timor-Leste, liu-liu tanba númeru kazu COVID-19 no ninia variante aumenta ba beibeik.

Notísia Relevante: COVID-19: óbitu ida, pozitivu 278 no ativu 2.729

“Ha’u apela ba kompatriota sira, ba sidadaun hotu-hotu tantu timor-oan no estranjeiru sira iha Timor-Leste, atu haktuir ba regra sanitária prevensaun nian hanesan uza máskara, fase liman ho sabaun no hadook malu pelu menus metru ida,” Deputadu Aniceto Longuinhos Guterres Lopes, fó hanoin asuntu ne’e bainhira prezide aniversáriu FALINTIL ba dala-46, iha Kuartél Jenerál, Fatuhada, Dili, sesta ne’e.

Nia dehan, ema hotu tenke halo prevensaun ba ida-idak nia-an atu salva an rasik, salva ema seluk, kolabora ho pesoál saúde sira no pesoál seluk iha linha frente sira.

Únika prevensaun mak hotu-hotu tenke habseik ba sentru saúde hodi simu vasina no kontinua kumpre protokolu hosi Ministériu Saúde no Organizasaun Mundiál Saúde nian.

Tanba, tuir nia, oras ne’e mundu tomak kontinua preokupa ho surtu ne’e no oras ne’e hasoru tán variante Delta entaun Timor-Leste mós la sees hosi situasaun hirak-ne’e.

Notísia Relevante: “Tinan 46 liu ona, mai ita hateke ba oin!”

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here