Membru Klibur Juventude Nasionalista Timorense (KJNT),kari aifunan iha jardim Eroi Metinaro Dili.Imajen/Tatoli Afonso do Rosário.

DILI,20 agostu 2021 (TATOLI)-Klibur Juventude Nasionalista Timorense (KJNT), sesta ne’e selebra aniversáriu FALINTIL ba dala 46 ho atividade kari ai-funan iha rate proklamadór Independensia, Saudozo Francisco Xavier do Amaral iha jardim eroi Metinaro Dili.

Prezidente KJNT Armindo Fernandes de Carvalho rekoiñese luta eroi no martir sira-nia boot tebes  ba libertasaun nasionál.

“Eroi no Mártir Libertasaun Nasionál sira-nia sakrifísiu boot tebes tanba fó-an ba mate, terus, no lakon família to’o Timor-Leste bele hetan ukun rasik-an,” Armindo Fernandes de Carvalho informa ba jornalista sira iha Jardim Eroi Metinaru Dili.

Nia dehan atividade kari ai-funan ne’e hodi fó omanajen ba eroi sira nune’e foinsa’e sira bele hatutan, hakbiit no hametin espíritu nasionalismu no patriotismu luta na’in sira-nian.

“Ohin mai vizita semitériu Eroi Metinaro atu mai halo reflesaun no fó omenajen ba saudozu Falintil sira ne’ebé ho aten barani no espíritu luta hodi fó-an ba mate iha batalla. Saudozu barak ne’ebé molok atu mate, sira sempre hakilar a luta continua, pátria ou morte venceremos no  balun ne’ebé iis la to’o ona maibé sira sei kumu liman ba luta ukun rasik aan,” nia hateten.

Tanba ne’e, iha komemorasaun aniversáriu FALINTIL ba dala 46 ne’e, Prezidente KJNT lori estrutura no membru tomak hato’o omanajen ba eroi sira ne’ebé fó ona sira-nia vida ba indepensia Timor-Leste, no  mós hatoo parabens ba FALINTIL hotu-hotu ne’ebé maka sei moris.

Entretantu, KJNT harii iha loron 20 fulan-setembru 2020 ho objetivu atu halibur foinsa’e sira hodi kumpre dever no obrigasaun síviku atu partisipa iha prosesu dezenvolvimentu no mós prezerva istória luta libertasaun nasionál.

Organizasaun ne’e iha ona membru besik ema na’in 30 iha Dili no daudaun ne’e loke tan sanak iha munisípiu Aileu, Ainaro, Manufahi no Rejiaun Administrativa Espesiál Oé-Cusse Ambeno (RAEOA).

Jornalista:Afonso do Rosário

Editór:Agapito dos Santos

HAKEREK NO HATÁN

Please enter your comment!
Please enter your name here