Prezidente Komisaun A PN, Joaquim dos Santos. Imajen Tatoli/Egas Cristóvão

DILI, 19 agostu 2021 (TATOLI)—Prezidente Komisaun A ne’ebé trata asuntu Justisa no Konstitusionál, Deputadu Joaquim dos Santos ‘Boraluli’, hateten tempu ona Governu Sentrál desentraliza podér administrasaun públika ba Governu lokál hodi aselera dezenvolvimentu.

Notísia Relevante: Komisaun A PN diskute projetu lei podér lokál iha espesialidade

Prezidente Komisaun A esplika, deputadu sira aprova ona projetu-lei podér lokál no dezentralizasaun administrativa iha munisípiu Covalima no hein de’it aprovasaun iha finál globál.

Nia dehan, lei refere atu fó kompeténsia tomak ba munisípiu sira atu hola desizaun ligasaun ba dezenvolvimentu munisipál.

“Agora ita tinan 20 independénsia entaun podér ne’e sentraliza iha nasionál natoon ona, no tempu ona desentraliza podér ne’e ba Governu lokál,” Prezidente Komisaun A informa ba jornalista sira, iha resintu Parlamentu Nasionál, foin lalais ne’e.

Nia dehan, rekursu umanu iha munisípiu sira preparadu maibé tenke iha lei hodi regula funsionamentu Governu lokál ne’e.

“Ita-nia polítiku sira iha munisípiu mós iha ona kapasidade entaun tenke desentraliza ona ba, sira mós bele ajuda aselera dezenvolvimentu,” nia dehan.

Ba oras ne’e daudaun, Komisaun A lideradu Deputadu Joaquim dos Santos, hala’o hela diskusaun faze espesialidade kona-ba lei eleitorál munisipál iha munisípiu Aileu.

Antes ne’e, Ministru Administrasaun Estatal, Miguel Pereira de Carvalho, fó-sai ona katak projetu-lei hirak ne’e inísia hosi Parlamentu Nasionál.

Nia esplika, projetu-lei eleitorál ne’e ko’alia kona-ba órgaun podér lokál ne’ebé povu mak hili tantu asembleia munisipál no prezidente autoridade munisípiu sira.

Nune’e mós projetu-lei podér lokál ne’e atu hakbesik serbisu públiku sira hosi Estadu ba kraik ka fó podér ho kompeténsia tomak ba munisípiu sira halo planu, programa no orsamentu rasik.

Projetu-lei desentralizasaun administrativa ne’e previstu atu Governu Sentrál halo transferénsia kompeténsia ka fó podér ba munisípiu sira, no atribui kompeténsia balu ne’ebé durante ne’e seidauk fó ba Governu munisipál.

“Tanba atu estabelese podér lokál ne’e mandatu konstitusionál ne’ebé temi iha artigu 72 Konstituisaun RDTL katak tenke iha podér lokál atu nune’e hakbesik serbisu públiku ne’e ba ita-nia populasaun sira ho forma mais efisiente no efikásia,” nia informa.

Notísia Relevante: Aban, Komisaun A debate projetu-lei podér lokál iha Covalima

Bainhira munisípiu sira iha ona podér lokál entaun sei promove dezenvolvimentu rurál, promove partisipasaun demokrátika ba populasaun sira iha área rurál.

Ministru Administrasaun Estatal ne’e apresia ho inisiativa Parlamentu Nasionál nian tanba hakbesik serbisu públiku ba munisípiu sira importante no espera Parlamentu Nasionál bele aselera projetu-lei hirak ne’e.

Maibé, nia dehan, to’o iha debate espesialidade Governu sei propoin atu halo alterasaun artigu balun iha projetu-lei hirak ne’e, nune’e implementasaun iha futuru labele hamosu problema.

Parlamentu Nasionál no Governu fó importánsia ba lei rua ne’e hodi komprimenta Konstituisaun RDTL artigu 72 (Podér lokál) ne’ebé númeru 1 hateten; sei harii kbiit lokál ho ema ne’ebé koletivu iha rai-laran ne’ebé iha órgaun reprezentativu, ho knaar atu organiza partisipasaun sidadaun idak-idak nian kona-ba solusaun problema rasik iha sira-nia komunidade no atu promove dezenvolvimentu lokál, no la afeta partisipasaun Estadu nian.

Númeru 2 hosi artigu 72 ne’e haktuir, organizasaun, kompeténsia, funsionamentu no kompozisaun órgaun kbiit lokál nian sei define tuir lei.

Notísia Relevante: PN aprova projetu-lei eleitorál munisipál-podér lokál iha jeneralidade

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here