Sekertáriu Estadu Portesaun Sivíl (SEPS), realiza enkontru Planu Asaun Anuál- Rezolusaun Konsellu Seguransa Nasoens Unidas 1325, kona-bá feto paz no seguransa. Iha salaun SEPS, kinta (19/08). Imajen Tatoli/Francisco Sony.

DILI, 19 agostu 2021 (TATOLI)—Sekretária Estadu Protesaun Sivíl (SEPS), liuhosi Diresaun Prevensaun Konflitu (DNPKK), ho liña ministériu no parseiru-sira kontinua deskuti Planu Asaun Nasionál (PAN) feto paz no seguransa, inklui konklui ona matadalan ba periúdu tinan lima atu lansa iha tinan ne’e.

Sekretáriu Estadu SEPS, Joaquim Gusmão, hateten diskusaun ne’e hanesan kontinuasaun ba preparasaun planu atu bele implementa iha futuru.

Notísia relevante:SEPS realiza formasaun sistema dadus dezastre iha Baucau

“Ekipa traballu liña ministériu lubuk ida ho parseiru-sira diskute hodi prepara no formula fila-fali planu ba faze daruak, ne’ebé sei lansa iha tinan ne’e, nu’udár matadalan atu bele implementa,” Joaquim Gusmão, hateten ba jornalista-sira iha edifísiu SEPS, Caicoli, kinta ne’e.

Ministériu Interiór (MI) liuhosi SEPS iha DNPKK mak responsável ba esbosu PAN, ne’ebé antes ne’e halo ona konsultasaun iha munisípiu-sira, hodi dezenvolve no artikula planu.

Iha esbosu PAN ne’e kontinua prioritiza no reforsa igualdade jéneru, sensibilizasaun jéneru, lideransa, prevensaun konflitu no sira-seluk.

Timor-Leste nu’udár menbru hosi Organizasaun Nasaun Unida (ONU), iha devér atu implementa planu asaun ba rezolusaun konsellu seguransa ONU 1325 ba feto paz no seguransa.

Antes ne’e, PAN 2016-2020, ne’ebé termina ona implementasaun iha koodenasaun ho ministériu lubuk ida no sosiedade sivíl ho asisténsia téknika hosi UN Women no  apoiu fundu millaun $2,8 hosi Governu Japaun.

Implementasaun PAN ne’e suporta atividade-sira promove no garantia feto-sira nia partisipasaun iha pozisaun no prosesu ba foti no halo desizaun sira, inklui setór defeza no seguransa, harii paz no dezenvolvimentu.

Dezde adopsaun PAN 1325 iha 2016, MI estabelese ona sekretariadu no estrutura koordenasaun ida hodi serbisu hamutuk ho liña ministériu 12 seluk no organizasaun sosiedade sivíl oi-oin atu alkansa planu ba atividade 47.

Atividade hirak-ne’e, organizadu ba pilár haat foka ba feto-sira nia partisipasaun iha lideransa no foti desizaun, prevensaun ba konflitu violentu, protesaun hosi violénsia no diskriminasaun no planu responsivu ba jéneru no justisa ba pos-konflitu atu harii paz.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here